Febrúarspá Siggu Kling - Nautið

Þú ert eins og bein rennibraut fyrir þá sem eru í kringum þig sem eru að eiga við erfiðleika. Það sest inn í alla þína tíðni, getur gefið þér verki, heilaþoku og mikla þreytu. Þessi orka er eins og hvirfilvindur í kringum þig og þú þarft að læra þá tækni að geta lokað huga þinn af, slökkva á símanum og að tengja þig við móður Jörð.

Það er ekki flókin aðgerð, þú ferð bara úr sokkum og skóm og setur þá hugsun inn að það séu að vaxa rætur inn í móður Jörð. Þá finnurðu einskonar þráð í gegnum líkamann og tengingu við Alheimsorkuna. Þetta er líkt því að stinga einhverju í samband við rafmagn og við erum í raun bara rafmagn.

Þú ert að læra svo mikið æðruleysi og þú leitar í andlega vegferð. Ástin verður eitthvað svo falleg, en ef hún er þér til bölvunar þá brotnar hún í byrjun febrúar. Vertu fegin, því það er svo margt í lífi þínu sem er bara vani.

Og til þess að brjóta upp vanamynstrið þá verðurðu að gera eitthvað öðruvísi. Það laðast að þér sterkar og tærar sálir sem að koma með svo fallegar setningar til þín. Svo hlustaðu betur, það er allt að hækka sem tengist ást og þó að eitthvað brotni eða slitni, þá er það bara að segja þér að það var ekki ást.

Taktu eftir því að það er eins og þú sért að breytast og að þroskast mjög hratt. Röddin þín hljómar öðruvísi og ef þú manst eftir draumum þínum þá verða þeir skýrari og vitund þín finnur á sér óvenjulegustu hluti sem gerast.

Það er mikill og fagur stormur í kringum fimmta febrúar því að þá er fullt tungl í Ljónsmerkinu. Þessi stormur er að koma til þess að hreinsa til. En vertu vakandi yfir þessum degi og dögunum í kringum hann.

Knús og kossar, Sigga Kling