Neytendur

Stjórn­völd þurfi að sýna að þau standi með al­menningi

Tryggvi Páll Tryggvason skrifar
Auður Alfa Ólafsdóttir, verkefnastjóri verðlagseftirlits Alþýðusambands Íslands.
Auður Alfa Ólafsdóttir, verkefnastjóri verðlagseftirlits Alþýðusambands Íslands. Rut Sigurðardóttir

Verkefnastjóri verðlagseftirlits Alþýðusambands Íslands segir að hið opinbera sé að kynda undir verðbólguna með ýmsum nýlegum hækkunum á opinberum gjöldum. Stjórnvöld þurfi að fara að sýna að þau standi með almenningi.

Þetta var á meðal þess sem kom fram í máli Auðar Ölfu Ólafsdóttur, verkefnastjóra verðlagseftirlits ASÍ, í beinni útsendingu í kvöldfréttum Stöðvar 2 í gær. Þar var hún beðin um að leggja mat á nýjustu verðbólgutölurnar sem birtust í gær. Þær leiddu í ljós að verðbólga síðustu tólf mánaða mælist 9,9 prósent.

„Við erum auðvitað að sjá það að helmingur af þessum hækkunum á vísitölu neysluverðs núna á milli mánaða er til kominn vegna skattahækkana og hækkunum á opinberum gjöldum. Þannig að það má eiginlega segja að hið opinbera sé að kynda undir verðbólguna. Við erum auðvitað líka að sjá hækkanir á nauðsynjavöru, eins og matvöru og eins eldsneyti. Svo eru ýmis gjöld tengd bílum að hækka mjög mikið,“ sagði Auður Alfa.

Slær hún þar með í sama streng og Neytendasamtökin, sem bentu á hið sama í gær. Þá benti aðalhagfræðingur Arion banka einnig á það í gær að megnið af hækkun vísitölu neysluverðs í janúar mætti rekja til gjaldskrárhækkana hins opinbera. Verðbólgumælingin setti einnig þrýsting á peningastefnunefnd Seðlabanka Íslands að hækka vexti enn frekar.

Auður Alfa var einnig spurð að því hvað væri hægt að gera til að ná verðbólgunni niður.

„Stjórnvöld þurfa auðvitað að fara að sýna að þau standi með almenningi. Bæði beita velferðarkerfinu til þess að lina höggið af verðbólgunni og lækka skatta. Þetta eru hvoru tveggja aðgerðir sem löndin í kringum okkur hafa verið að ráðast í. Svo þurfa þau að láta af óréttlátri skattheimtu og beina spjótum sínum frekar að þeim sem hafa breiðu bökin í samfélaginu. Svo auðvitað sjáum við það svigrúm fyrirtækja, sérstaklega fyrirtækja á þessum fákeppnismarkaði, eins og eldsneytis og matvörumarkaði, að það er töluvert, til þess að lækka verð. Við auðvitað köllum eftir því að fyrirtæki sjái sóma sinn í að gera það,“ sagði hún.

Hún reiknar þó með því að verðbólgan fari hjaðnandi næstu misseri.

„Við viljum nú meina það að verðbólgan fari að hjaðna og hækkanir á nauðsynjavöru hafi toppað núna. Þá förum við eflaust að sjá húsnæðisliðinn detta meira inn, þannig að lækkun á húsnæðisliðnum fari að hafa meiri áhrif á lækkun á verðbólgunni.“


Tengdar fréttir

Verð­bólgu­kippur í boði hins opin­bera kú­vendir ekki horfunum

Megnið af hækkun vísitölu neysluverðs í janúar má rekja til gjaldskrárhækkana hins opinbera en verðbólgumælingin setur þrýsting á peningastefnunefnd Seðlabanka Íslands að hækka vexti enn frekar. Þetta er á meðal þess sem kemur fram í bréfi sem Erna Björg Sverrisdóttir, aðalhagfræðingur Arion banka, sendi á viðskiptavini í dag.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×