Fund­u tvær reik­i­stjörn­ur á líf­belt­i fjar­lægs dvergs

Alls hafa fjórar reikistjörnur fundist á braut um svokallaðan rauðan dverg. Sólkerfið kallast TOI 700 og er í um hundrað ljósára fjarlægð frá sólkerfinu okkar.

Umræddir vísindamenn beindu sjónaukum gervihnattar Geimvísindastofnunar Bandaríkjanna (NASA) sem kallast Transiting Exoplanet Survey Satellite, eða TESS, að sólkerfinu og með því að greina þegar ljósgeislun stjarna minnkar og hve mikið, er hægt að finna reikistjörnur á braut um þessar stjörnur, í fljótu máli sagt.

Með gögnum sem gervihnötturinn aflar geta vísindamenn einnig komist að því hve stórar þessar reikistjörnur eru og hve langan tíma það tekur þær að fara hring um stjörnuna.

Í tilkynningu á vef NASA segir að reikistjörnurnar á lífbeltinu kallist TOI 700 d og e. Vísindamennirnir segja að TOI 700 sé eitt af fáum sólkerfum þar sem vitað er af reikistjörnum á lífbeltinu. Því gæti það borgað sig að skoða það betur í framtíðinni.

Annað sólkerfi þar sem reikistjörnur hafa fundist á lífbeltinu er Trappist-1.

Lífbeltið táknar það svæði frá stjörnunni þar sem hægt er að finna vatn í fljótandi formi. Það er að segja að umræddar reikistjörnur eru ekki svo langt frá stjörnunni að allt vatn frýs og ekki svo nærri að allt vatn gufar upp.

TOI 700 b, innsta reikistjarna sólkerfisins fer hring um stjörnuna á hverjum tíu dögum. Hún er litlu minna en jörðin. TOI 700 c er 2,5 sinnum stærri en jörðin og fer hring um stjörnuna á sextán dögum. TOI 700 d er fimmtungi stærri en jörðin og fer hringinn á 37 dögum.

Sjá einnig: Minnsta reikistjarnan fannst á braut um nágranna okkar

TOI 700 e og nýjasta reikistjarnan sem fundist hefur á braut um stjörnuna er um tíu prósentum minni en jörðin og fer hringinn á 28 dögum.

Umræddir vísindamenn telja líklegt að fyrstu reikistjörnurnar tvær beini alltaf sömu hliðinni að stjörnunni og TOI 700 e geri það mögulega einnig.