Ellefu á topp tíu listanum í kjöri íþróttamanns ársins í ár

Óskar Ófeigur Jónsson skrifar 23. desember 2022 06:00

Hér eru þau ellefu sem urðu í tíu efstu sætunum í kjörinu. Ríkjandi Íþróttamaður ársins, Ómar Ingi Magnússon er með styttuna. Aðrir á myndinni eru: Efri röð frá vinstri: Sandra Sigurðardóttir, Kristín Þórhallsdóttir, Anton Sveinn McKee, Viktor Gísli Hallgrímsson og Guðmundur Ágúst Kristjánsson. Neðri röð frá vinstri: Hilmar Örn Jónsson, Elvar Már Friðriksson, Glódís Perla Viggósdóttir, Tryggvi Snær Hlinason og Gísli Þorgeir Kristjánsson. Samsett

Vísir birtir í dag topp tíu listann yfir besta íþróttafólks ársins á Íslandi að mati Samtaka íþróttafréttamanna en aðeins í áttunda skiptið í 67 ára sögu kjörsins voru íþróttamenn jafnir í 10. til 11. sæti. Það eru því ellefu sem eru tilnefnd í ár.

Samtök íþróttafréttamanna hafa nú opinberað það hvaða tíu íþróttamenn fengu flest atkvæði í kjörinu á Íþróttamanni ársins fyrir árið 2022 en eins eru fjórir tilnefndir sem þjálfari ársins 2022 og þrjú lið sem lið ársins 2022. Eins og venjan er þá er topp tíu listinn kynntur á Þorláksmessu en valið síðan gert opinbert á milli jóla og nýárs.

Þetta var mjög spennandi kjör í ár sem sést á því að ellefu eru á topp tíu listanum yfir besta íþróttafólk ársins og fjórir eru á topp þrjú listanum yfir bestu þjálfarann. Ástæðan er að tveir voru jafnir í tíunda og ellefta sæti í kjöri íþróttamanns ársins og tveir þjálfarar voru jafnir í þriðja sæti í kjörinu á besta þjálfara ársins.

Tveir jafnir í 10. og 11. sæti

Ómar Ingi Magnússon var kjörinn Íþróttamaður ársins í fyrra.Vísir

Í ár gerðist það að tveir íþróttamenn urðu jafnir að stigum í 10. - 11. sæti. Reglur kjörsins segja aðeins til um hvað gera eigi séu tveir jafnir í fyrsta sæti. Reglurnar ná ekki yfir sætin fyrir neðan. Það eru því ellefu íþróttamenn á topp listanum í ár. Það gerðist síðast árið 2000. Alls hefur það sjö sinnum gerst að topp ellefu listi hefur verið birtur í stað topp tíu. Árin 1963, 1978, 1982, 1984, 1985, 1988 og 2000 var topp 11 listi, þ.e. tveir jafnir í 10. sæti.

Íþróttamaður ársins verður valinn fimmtudaginn 29. desember næstkomandi. 31 meðlimur úr Samtökum íþróttafréttamanna hafði atkvæðisrétt og tóku allir þátt í kjörinu. Kjöri Samtaka íþróttafréttamanna á íþróttamanni, liði og þjálfara ársins 2022 verður lýst í Hörpu 29. desember næstkomandi. Sýnt verður beint frá hófinu á RÚV klukkan 19:40.

Kjörið fer fram í 67. sinn

Þetta verður í 67. sinn sem Íþróttamaður ársins er útnefndur af Samtökum Íþróttafréttamanna en fyrstur til að hljóta þessa viðurkenningu var Vilhjálmur Einarsson árið 1956 en hann vann það ár silfurverðlaun á Ólympíuleikunum í Melbourne í Ástralíu.

Ríkjandi Íþróttamaður ársins er handboltamaðurinn Ómar Ingi Magnússon og hann er einnig tilnefndur í ár. Ómar Ingi er einn af þremur handboltamönnum á topp tíu listanum en þar eru einnig liðsfélagi hans hjá Magdeburg, Gísli Þorgeir Kristjánsson, og liðfélagi hans í landsliðinu, Viktor Gísli Hallgrímsson.

Tvær knattspyrnukonur eru einnig á topp tíu listanum en það eru landsliðskonurnar Glódís Perla Viggósdóttir og Sandra Sigurðardóttir. Þær eru tvær af þremur konum á listanum en sú þriðja er kraftlyftingakonan Kristín Þórhallsdóttir. Sandra er nýliði á listanum en Glódís Perla er þar í þriðja sinn.

Tveir körfuboltamenn eru á listanum eða þeir Tryggvi Snær Hlinason og Elvar Már Friðriksson. Tryggvi er í annað sinn á topp tíu en Elvar er nýliði.

Sundmaðurinn Anton Sveinn McKee er á listanum í þriðja sinn en þetta er í þriðja sinn á fjórum árum sem hann er í hópi þeirra bestu. Anton er ásamt Glódísi Perlu sá sem hefur oftast verið í hópi þeirra tíu bestu af þeim sem eru tilnefnd í ár.

Kylfingurinn Guðmundur Ágúst Kristjánsson er nú á topp tíu listanum í annað skiptið en hann var einnig á honum fyrir þremur árum síðan.

Aðeins tvö voru á listanum í fyrra

Aðeins tvö af ellefu á listanum yfir besta íþróttafólk ársins í ár var einnig á topp tíu listanum í fyrra. Þau sem voru einnig á listanum í fyrra eru Kristín Þórhallsdóttir og Ómar Ingi Magnússon. Kristín slær met sitt frá því fyrra yfir að vera elsta konan til að komast á topp tíu listann en hún er 38 ára gömul. Sandra Sigurðardóttir er aðeins tveimur árum yngri eða 36 ára.

Fimm eru aftur á móti algjörir nýliðar í hópi þeirra tíu bestu eða það eru þau Elvar Már Friðriksson, Gísli Þorgeir Kristjánsson, Hilmar Örn Jónsson, Sandra Sigurðardóttir og Viktor Gísli Hallgrímsson.

Þjálfarnir sem koma til greina sem þjálfari ársins eru Guðmundur Þ. Guðmundsson, þjálfari íslenska karlalandsliðsins í handbolta, Óskar Hrafn Þorvaldsson, þjálfari Íslandsmeistara Breiðabliks í fótbolta karla, Snorri Steinn Guðjónsson, þjálfari Íslands- og bikarmeistara Vals í handbolta karla og Þórir Hergeirsson, þjálfari Evrópu- og heimsmeistara Noregs í handbolta kvenna.