Innlent

Fimm og hálft ár fyrir árás með öxi að vopni

Kolbeinn Tumi Daðason skrifar
Dómur féll í Landsrétti eftir hádegið í dag.
Dómur féll í Landsrétti eftir hádegið í dag. Vísir/Vilhelm

Landsréttur þyngdi í dag dóm yfir Davíð Nikulássyni, 48 ára karlmanni, sem réðst á annan karlmann vopnaður öxi fyrir tveimur árum. Davíð var dæmdur í fimm og hálfs árs fangelsi sem er þynging um ár frá í héraði í fyrra þegar hann hlaut fjögurra og hálfs árs dóm.

Davíð hlaut dóm fyrir tilraun til manndráps annars vegar og vopnalagabrot hins vegar. Þá var hann dæmdur til að greiða brotaþola í málinu 1,5 milljónir króna í miskabætur.

Það var á áttunda tímanum laugardagskvöldið 31. október árið 2020 sem lögreglu barst tilkynning um slasaðan mann. Sá væri með áverka á höfði og Davíð væri grunaður um að hafa veitt honum áverkana með öxi. Af dómnum að ræða má ætla að mennirnir hafi leigt herbergi í sama húsi.

Á vettvangi var hinn slasaði með stóran skurð á höfði, mikið hafði blætt út og var hann þakinn í blóði í andliti og niður líkamann. Hann var með fulla meðvitund en upplýsti að hann væri undir áhrifum áfengis og hefði tekið inn amfetamín.

Blóðslóð eftir ganginum

Lögregla náði sambandi við Davíð símleiðis sem reyndist samvinnuþýður og gaf sig fram. Á höndum hans og fatnaði mátti sjá blóð. Var hann vistaður í fangageymslu.

Við rannsókn lögreglu kom í ljós að blóðslóð lá eftir ganginum frá útidyrum við heimili Davíðs, eftir ganginum og að herbergi sem hann leigði. Blóðkám var á víð og dreif. Í borðplötu skrifborðs í herberginu stóð öxi föst og var blóð á skafti hennar.

Við leit í herberginu fundust tvær aðrar axir sem voru haldlagðar ásamt þeirri blóði drifnu. Sömu sögu var að segja um heimasmíðað sverð, tvo hnífa í slíðri, tvo kasthnífa, fiðrildahníf, magasín með tveimur skotum í og eftirlíkingu af handsprengju.

„Eins og böðull“

Davíð var ákærður fyrir að hafa ítrekað lagt til mannsins með öxi með átta sentímetra löngu blaði, bæði í höfuð og búk. Afleiðingarnar voru þær að maðurinn hlaut opinn sjö sentímetra langan skurð frá miðju enni að hársrót, brot á höfuðkúpu og andlitsbeinum, blæðingu og nokkra skurði á enni, brjóstkassa og upphandlegg.

Davíð og karlmaðurinn lýstu atvikum með ólíkum hætti. Davíð bar fyrir sig að hann hefði slegið óvart karlmanninn í áflogum þeirra á milli í herbergi Davíðs vegna ágreinings. Davíð sagði karlmanninn hafa látið dólgslega og tekið upp öxina. Hann hefði neitað að yfirgefa herbergið.

Brotaþolinn sagði Davíð hafa orðið leiðinlegan og verið að höggva með öxinni í borðplötu. Hann hefði tekið öxina af honum en skemmt útskorinn mun í eigu Davíðs þegar hann lagði öxina á borðið. Hann hefði gripið vodkaflösku, haldið í kjöltu sinni en Davíð mölbrotið flöskuna.

Hann hefði síðan hafið öxi á loft, aðra en þá sem hann hefði barið í borðið, og slegið hann með öxinni „eins og böðull“. Hann hefði í framhaldinu flúið úr herberginu. Læknir sem gaf skýrslu fyrir dómi sagði höfuðáverka hafa sett hinn slasaða í lífshættu. Réttarmeinafræðingur bætti við að töluverðan kraft hefði þurft til að veita áverkana.

Ekkert styddi nauðvörn

Héraðsdómur Reykjaness horfði til þess að brotaþoli í málinu hefði frá upphafi verið staðfastur í framburði sínum. Framburðurinn fengi stoð í vottorðum sérfræðinga. Þótti dómnum sannað að með staðföstum framburði og gögnum að ekki yrði véfengt með skynsamlegum rökum að Davíð hefði af ásetningi lagt til mannsins með öxinni.

Dómurinn taldi þó ósannað að hann hefði lagt til hans ítrekað. Var hann sýknaður af þeim sakargiftum. Ekkert hefði komið fram sem styddi framburð Davíðs um að hann hefði verið í nauðvörn umrætt skipti. Árásin hefði verið gerð með vopni sem augljóslega væri til þess fallið að bana manni.

Davíð hlyti að vera það ljóst. Hending ein hefði ráðið því að viðkomandi hefði ekki dáið vegna atlögunnar. Davíð játaði sök hvað varðaði vopnalagabrot vegna vopna á heimili hans. Voru þau gerð upptæk.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.