Viðskipti erlent

Síðasta Boeing 747-þotan úr flugvélaverksmiðjunni

Kristján Már Unnarsson skrifar
Síðasta Boeing 747-þotan dregin úr flugvélaverksmiðjunni í Everett í gærkvöldi. Húsið telst það stærsta í heimi að rúmmáli.
Síðasta Boeing 747-þotan dregin úr flugvélaverksmiðjunni í Everett í gærkvöldi. Húsið telst það stærsta í heimi að rúmmáli. Boeing/Paul Weatherman

Síðasta eintak júmbóþotunnar, eða Boeing 747, fór út úr samsetningarverksmiðju Boeing í borginni Everett norðan Seattle í Washington-ríki í gærkvöldi. Þetta er fraktvél af undirtegundinni 747-8 og verður afhent bandaríska vöruflutningafélaginu Atlas Air snemma á næsta ári.

Þar með lýkur smíði þessarar fyrstu breiðþotu heims sem jafnframt var sú fyrsta með farþegarými á tveimur hæðum. Framleiðsla hennar hófst árið 1967 og hafa alls 1.574 eintök verið smíðuð.

„Í meira en hálfa öld hafa tugþúsundir dyggra starfsmanna Boeing hannað og smíðað þessa stórkostlegu flugvél sem hefur sannarlega breytt heiminum. Við erum stolt af því að þessi vél muni halda áfram að fljúga um allan heim um ókomin ár," er haft eftir Kim Smith, varaforseta Boeing og framleiðslustjóra 747 og 767-vélanna í fréttatilkynningu Boeing.

Síðasta eintakið, númer 1.574, yfirgefur framleiðslugólfið.Boeing/Paul Weatherman

Þotan olli straumhvörfum í flugsamgöngum þegar Pan Am, fyrst flugfélaga, tók hana í notkun árið 1970. Hún er talin hafa átt einn stærsta þátt í því að flugfargjöld lækkuðu og að flugferðir milli heimsálfa urðu á færi almennings á Vesturlöndum.

Fyrstu gerðirnar voru sjötíu metra langar með sextíu metra vænghaf og gátu tekið yfir 400 farþega, fleiri en nokkur önnur flugvélartegund. Síðasta gerðin er 76 metra löng og getur hún borið allt að 133 tonna farm en farflughraði hennar er um 900 kílómetrar á klukkustund.

Flugfélög hafa almennt verið að hætta notkun hennar til farþegaflutninga á undanförnum árum. Þar hefur þessi fjögurra hreyfla þota vikið fyrir mun hagkvæmari tveggja hreyfla breiðþotum, eins og Boeing 777 og Airbus A350.

Líkan af Boeing 747 í litum Loftleiða á borði framkvæmdastjórnar Flugleiða eftir að Loftleiðir og Flugfélag Íslands sameinuðust árið 1973. Til ársins 1976 voru þrír forstjórar, þeir Sigurður Helgason, Örn Ó. Johnson og Alfreð Elíasson, sem sjást við borðsendann.Skjáskot/Úr myndinni Alfreð Elíasson og Loftleiðir

Af íslenskum flugfélögum hefur Air Atlanta verið stærsti flugrekandi Boeing 747. Litlu munaði að Loftleiðir keyptu tvær vélar árið 1972 og Flugleiðir notuðu eina slíka í pílagrímaflugi um skamma hríð árið 1982. 

Þá hefur Cargolux, sem Loftleiðamenn tóku þátt í að stofna árið 1970, verið leiðandi í notkun Boeing 747 til fraktflutninga og er núna með þrjátíu í rekstri.


Tengdar fréttir

Air Atlanta sendir þrjár júmbó-þotur í niðurrif

Forsvarsmenn Flugfélagsins Air Atlanta hafa ákveðið að láta rífa þrjár af sjö Boeing 747-400 farþegaþotum félagsins. Þoturnar eru á bilinu 18 til 23 ára gamlar og hafa að undanförnu verið í þjónustu Saudia-flugfélagsins, ríkisflugfélags Sádi-Arabíu.

British Airways leggur júmbó-þotunni

Breska flugfélagið British Airways hefur ákveðið að leggja öllum Boeing 747 júmbó þotum sínum. Til þessa hefur ekkert annað flugfélag í heiminum notað jafnmargar júmbó þotur í flugáætlun sinni

Fimmtíu ár frá fyrsta flugi júmbó-þotunnar

Flugheimurinn fagnar því um helgina að fimmtíu ár eru liðin frá fyrsta flugi Boeing 747 risaþotunnar, fyrstu breiðþotu heims. Júmbó-þotan olli straumhvörfum í flugsamgöngum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.