Tvær til þrjár rusla­tunnur við sér­býli

Í tilkynningu frá Sorpu segir að samræmt flokkunarkerfi taki gildi um áramótin. Sveitarfélögin á höfuðborgarsvæðinu, Garðabær, Hafnarfjörður, Kjósarhreppur, Kópavogur, Mosfellsbær, Reykjavík og Seltjarnarnes, hafa unnið ötullega að undirbúningi nýja kerfisins undanfarin tvö ár. Stefnt sé að því að innleiðing breytinganna hefjist á vormánuðum 2023.

Sorpa segir íbúa ekki þurfa að aðhafast neitt í tengslum við þessa breytingu annað en að tileinka sér nýja flokkunarsiði. Tunnum fyrir þessa fjóra flokka verður komið fyrir við íbúðarhús eftir þörfum. Meginmarkmiðið sé að fjölga tunnum hjá íbúum eins lítið og hægt er og í flestum tilfellum verði leitast við að koma tunnum fyrir í því rými sem er þegar til staðar við íbúðarhús.

Í hinu nýja kerfi verða því að jafnaði tvær til þrjár tunnur við sérbýli þar sem boðið verður upp á tvískiptar tunnur en í fjölbýlishúsum fer útfærsla eftir aðstæðum á hverjum stað.

Nú verður skylda að flokka matarleifar frá öðrum úrgangi. Til að auðvelda breytinguna fá öll heimili á höfuðborgarsvæðinu gefins sérstaka körfu undir matarleifarnar og pappírspoka sem fara í hana.

„Með því að flokka matarleifar frá blönduðum heimilisúrgangi er hægt að endurvinna þær í metangas og moltu. Hið samræmda flokkunarkerfi sveitarfélaganna mun því draga stórlega úr urðun og síðar brennslu á úrgangi og styðja við innleiðingu hringrásarhagkerfisins,“ segir í tilkynningunni.

Samhliða þessum breytingum verður grenndargámum gefið nýtt hlutverk við að taka á móti málmi, gleri, textíl og skilagjaldsskyldum umbúðum, sem samkvæmt lögum ber að flokka sérstaklega og safna í nágrenni við íbúa.

Á vefsíðunni Flokkum.is er fyrirkomulag við sérbýli og fjölbýli skoðað nánar. Við sérbýli verða ýmist tvær eða þrjár tunnur eftir því hvernig plássið verður. Stærri tunnur verða nýttar við fjölbýlishús.

• Fyrir breytingu: þrjú 660 lítra kör eða samtals 1.980 lítrar.
• Eftir breytingu: tvö 660 lítra kör (annað fyrir pappír/pappa og hitt fyrir plastumbúðir), ein 360 lítra tunna fyrir blandaðan úrgang og ein 240 lítra tunna fyrir matarleifar, samtals 1.920 lítrar.

Daníel Árnason, framkvæmdastjóri Eignaumsjónar, sagðist á dögunum telja að formenn húsfélaga séu almennt jákvæðir gagnvart breytingunum. Víða sé þetta þó stórt verkefni. Sums staðar muni þurfa að byggja sorpgerði utanhúss í stað þess að vera með sorpið í þröngum geymslum innandyra.

„Frávik í umgengni og frávik í flokkun veldur ákveðnum vandkvæðum í daglegum rekstri húsfélaga þannig að þetta mál er alltaf ljóslifandi fyrir forsvarsaðilum húsfélaga,“ sagði Daníel í Morgunblaðinu á dögunum.

En hvað þarf að flokka?

Í tunnu fyrir matarleifar fer meðal annars:

• eggjaskurn
• matarleifar með beini
• kaffikorgur
• fiskiúrgangur

Í tunnu fyrir plastumbúðir fer meðal annars:

• snakkpokar
• plastfilma
• plastpokar
• sjampóbrúsar

Í tunnu fyrir pappír og pappa fer meðal annars:

• dagblöð
• pappírsumbúðir
• bréfpokar
• pítsakassar

Í tunnu fyrir blandaðan úrgang fer meðal annars:

• dömubindi
• blautklútar
• bleyjur
• ryksugupokar

Þá verður málmumbúðum (niðursuðudósir o.fl.) og glerumbúðum (glerkrukkur o.fl.) safnað á grenndarstöðvum.

Matarleifum verður safnað í bréfpoka sem sveitarfélögin útvega íbúum. Pokarnir hafa gefist mjög vel á Norðurlöndunum og skipta lykilmáli til að hægt sé að vinna nothæfa moltu úr matarleifunum. Þá munu sveitarfélögin útvega íbúum ílát til að safna matarleifum inn á heimilum.