James Einar Becker er stjórnandi þáttanna, Tork gaurinn sjálfur. Hongqi bíllinn sem hann prófar í þættinum er þessa stundina sá einni sinnar tegundar á landinu. Hann er 551 hestafla kínverskur rafmagnsbíll með drægni upp á 480 kílómetra. Þá er hann fjórhjóladrifinn og með nudd í sætunum.

Hægt er að sjá þáttinn í spilaranum hér fyrir neðan, en sjá má fyrri þætti hér. 

Einungis tvö sæti eru aftur í bílnum. James Einar segir aftursætin vera tilvalin fyrir fólk í viðskiptaheiminum sem vill láta keyra sig um bæinn frekar en að keyra sjálft. Þó er hægt að bæta við tveimur auka sætum aftar í bílnum ef til þess kemur. 

Líkt og áður kom fram er bíllinn rafmagnsbíll en nánast allt í honum gengur á rafmagni, meira að segja hurðarhúnarnir og innstungulokið. Þá má finna „stemningsljós“, eins og James Einar kallar þau, um allan bíl. Það eru ljós við bensíngjöfina, í hurðunum og fleiri stöðum. 

„Ef að Rolls Royce Cullinan og Lincoln Navigator myndu eignast barn saman myndi það barn sennilega líta út eins og Hongqi e-HS9-bíllinn,“ segir James Einar um útlit bílsins.