Fótbolti

Breiðablik að kaupa Johannesen á 11 milljónir

Smári Jökull Jónsson skrifar
Patrik Johannesen skorar hér fyrir Keflavík gegn Leikni í sumar.
Patrik Johannesen skorar hér fyrir Keflavík gegn Leikni í sumar. Vísir/Diego

Greint er frá því í hlaðvarpinu Dr.Football að framherjinn Patrik Johannesen sé á leið til Breiðabliks frá Keflavík. Talið er að Íslandsmeistararnir kaupi Johannesen á ellefu milljónir frá Keflvíkingum.

Færeyingurinn Johannesen hefur verið orðaður bæði við Breiðablik og Val nú á haustdögum og nú virðist sem félagaskiptin til Blika séu að verða að veruleika. Johannesen skoraði tólf mörk og lagði upp tvö fyrir Keflavík í sumar og átti mjög gott tímabil.

Breiðablik vann Bestu deildina í sumar með töluverðum yfirburðum en Keflavík vann Forsetabikarinn sem veittur var fyrir sigur í keppni sex neðstu liða deildarinnar eftir að Bestu deildinni var skipt í tvennt.

Breiðablik hefur styrkt sig töluvert eftir að Íslandsmótinu lauk í október. Eyþór Aron Wöhler gekk til liðs við Íslandsmeistarana frá ÍA og þá tryggðu Blikar sér einnig þjónustu Alex Freys Elíssonar frá Fram.

Patrik Johannesen er landsliðsmaður Færeyja en hann gekk til liðs við Keflavík fyrir tímabilið. Hann hefur leikið átján leiki fyrir Færeyinga og skorað í þeim eitt mark.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.