Efast um hæfi MAST

Í lok sumars var fyrst greint frá því að eigendur 25 hrossa í Borgarfirði væru sakaðir um illa meðferð á skepnum sínum. Steinunn Árnadóttir, íbúi Borgarness, sagði þá í samtali við fréttastofu að hún hafi ítrekað sent erindi til MAST og vissi um fleiri sem hefðu gert slíkt hið sama. 

Þá sagði dýralæknir hrossasjúkdóma hjá MAST í ágúst að málið væri í ferli. Í gær birti MAST síðan yfirlýsingu þar sem sagt var að stofnunin hafi gripið til aðgerða og skipað eigendunum að hleypa hestunum út sem höfðu verið lokaðir inni í litlum hólfum um langt skeið. 

Samtök um dýravelferð á Íslandi gefa lítið fyrir þessa yfirlýsingu MAST og segja að athafnir fylgi ekki orðum þeirra. Samtökin kalla eftir tafarlausum aðgerðum. 

„Enginn vafi er á því að Matvælastofnun (MAST) hefur þær lagaheimildir til að svipta dýr úr umsjá umráðaaðila ef úrbætur þola enga bið. Sú afstaða að dýr njóti lagalegrar verndar er meginandlag dýravelferðarlaga,“ segir í yfirlýsingu samtakanna. 

Samtökin segja MAST vera eina bjargræði dýranna sem lögunum er ætlað að vernda. Því skjóti það skökku við að MAST skuli „halda verndarhendi yfir mannfólki sem tekur að sér að halda dýr og veldur ekki því verkefni,“ eins og það er orðað í yfirlýsingunni. 

Skora á MAST

Líkt og sjá má á myndum sem birst hafa hér á Vísi eru hrossin afar horuð og feldur þeirra í slæmu ásigkomulagi eftir innilokun og vanfóðrun til lengri tíma. Samtökin þakka Steinunni Árnadóttur fyrir myndirnar en hún er sú sem hefur tekið allar þær myndir sem birst hafa í fjölmiðlum. 

„Viðbrögð MAST eru ekki í samræmi við alvarleika málsins og vekja enn frekari efasemdir um hæfi stofnunarinnar til að sinna eftirliti með velferð dýra. SDÍ skorar á MAST að tryggja viðunandi aðbúnað dýranna á meðan „málið er í ferli“,“ segir í yfirlýsingu samtakanna. 

Hér fyrir neðan má lesa yfirlýsingu samtakanna í heild sinni.