Full ástæða til að halda áfram að kortleggja hatursorðræðu á Íslandi

Starfshópurinn var skipaður af forsætisráðherra í sumar til að bregðast við vísbendingum um vaxandi hatursorðræðu í íslensku samfélagi en á síðustu vikum hafa fulltrúar frá á þriðja tug hagsmunasamtaka sótt fundi hópsins. Dagný Jónsdóttir, formaður starfshópsins, segir fundina gefa þeim mikið fóður inn í umræðuna sem er fram undan.

„Það höfðu allir bara mjög margt að segja sem að hittu hópinn og þetta voru mjög góðar og málefnalegar umræður, líka tilfinningaríkar, og það er einhvern veginn bara allt sviðið undir,“ segir Dagný.

Hlutverk hópsins er að ná fram samhæfðum aðgerðum gegn hatursorðræðu í garð ýmissa hópa sem verða fyrir fordómum meðal annars vegna kynþáttar, litarháttar, þjóðaernisuppruna, kynhneigðar og kynvitundar. Starfshópurinn mun halda áfram að kortleggja stöðuna.

„Við höldum ótrauð áfram og okkur er ætlað að skila fyrir áramót og það má líka geta þess að út frá þessu þá viljum við heyra í fleirum þannig við ætlum að halda opinn fund í lok október þar sem fólki gefst þá færi til að ræða þessi mál,“ segir Dagný.

Hampa árangri Íslands í hinsegin málum

Hvað hinsegin málefni varðar hefur Íslandi í gegnum tíðina verið hampað fyrir góðan árangur en stefna íslenskra stjórnvalda í hinsegin málum var til umfjöllunar á dögunum hjá miðlinum Pink News.

Var þar vísað til þess að íslensk stjórnvöld stefni að því að binda endi á bann samkynhneigðra karlmanna til að gefa blóð, koma á fót þjálfun í hinsegin málefnum fyrir lögreglu, og tryggja viðeigandi heilbrigðisþjónustu fyrir trans einstaklinga. Ísland væri ofarlega á svokölluðu regnbogakorti Evrópu en Danmörk hafi sótt í sig veðrið á meðan Bretland væri að falla úr lestinni.

Hinsegin fólk á Íslandi hefur þó talað um ákveðið bakslag í baráttunni, meðal annars vegna hatursorðræðu, og var það áberandi punktur í kringum Hinsegin daga síðastliðinn ágúst. Þá sagðist mannréttinda- og ofbeldisvarnarráð hafa miklar áhyggjur af stöðu hinsegin barna og ungmenna í skóla- og frístundastarfi en umræddur hópur yrði oft fyrir aðkasti innan og utan veggja skólans.

Hvort meira þurfi til í þeim málaflokki, eða öðrum, segir Dagný í hið minnsta ljóst að ákveðnir hópar komi verr út en aðrir eins og staðan er í dag en erfitt sé að leggja mat á það hvort hatursorðræða fari vaxandi.

„Hlutverkið okkar er sem sagt að skoða hvort að stjórnvöld skuli setja heildstæða áætlun um þessar aðgerðir stjórnvalda. Mitt mat er það, og ég held að flestir geti tekið undir það með mér eftir þessi viðtöl, að það er svo sannarlega ástæða til að halda þessari vinnu áfram,“ segir Dagný.