Segir Murat hafa í­trekað breytt fram­burði sínum og veru­lega ó­trú­verðugan

Angjelin Sterkaj hefur játað að hafa banað Armando laugardagskvöldið 13. febrúar í fyrra fyrir utan heimili Armando í Rauðagerði. Angjelin hefur þó frá upphafi haldið því fram að hann hafi verið einn að verki og auk þess sagt að hann hafi banað Armando í sjálfsvörn. Fundur þeirra þetta kvöld hafi átt að vera sáttafundur en ekki fyrirframplanað morð. 

Saksóknarar halda því fram, og segir í ákæru, að Murat, Claudia og Shpetim hafi hvert um sig spilað þátt í morðinu. Murat er ákærður fyrir að hafa sýnt Claudiu tvær bifreiðar í umsjón Armando sem hún átti að fylgjast með. Claudia er ákærð fyrir að hafa fylgst með bifreiðunum og látið Angjelin, fyrrverandi ástmann sinn, vita af ferðum Armandos þetta kvöld. 

Shpetim er ákærður fyrir að hafa ekið bílnum sem Angjelin fór í að Rauðagerði til að myrða Armando. Þau eru þá öll sögð hafa vitað af áætlun Angjelins fyrir fram og tekið þátt í atburðarrásinni sem leiddi til dauða Armandos. 

Kolbrún Benediktsdótir, varahéraðssaksóknari, sækir málið í Landsrétti rétt eins og hún gerði í héraði. Hún hóf málflutning sinn klukkan níu í morgun og hefur lagt áherslu á að þremenningarnir, Shpetim, Murat og Claudia hafi vitað af ætlunum Angjelins fyrir fram. Þá hafi Angjelin, þvert á það sem hann heldur fram, skipulagt morðið. Hann hafi til að mynda beitt skammbyssu með hljóðdeyfi í árásinni og vegna myndbandsgagna bendi allt til að hann hafi verið búinn að skrúfa hljóðdeyfinn á byssuna áður en hann fór og hitti Armando fyrir utan heimili hans þetta kvöld. 

Ekkert nýtt hefur komið fram fyrir Landsrétti í málinu, frá því sem fyrir lá eftir aðalmeðferð í héraðsdómi. Ólíklegt er því að málflutningur saksóknara og verjenda  verði í megindráttum öðruvísi en þá. Fréttastofa fjallaði ítarlega um málflutninginn þegar hann fór fram fyrir héraðsdómi í fyrra. 

Murat hafi logið til um hvar Angjelin væri

Kolbrún lagði þó sérstaklega áherslu á hlut Murats í málflutningi sínum í dag. Geir Gestsson verjandi Murats var mjög harðorður bæði í garð saksóknara og lögreglu þegar málið var tekið fyrir í héraðsdómi í fyrra og sakaði lögreglu til dæmis um að hafa gert lítið úr framburði Angjelins í skýrslutöku þar sem hann gekkst við því að hafa fyrirskipað Claudiu að vakta bifreiðar í eigu Armandos  kvöldið sem hann var skotinn til bana. Dómarinn í málinu tók undir með Geir í niðurstöðukafla dómsins. 

Kolbrún sagði í lok málflutnings síns að gagnrýni verjandans fyrir heraðsdómi hafi ekki átt rétt á sér og athugasemdir hans hafi veri mjög alvarlegar. Greinargerð lögreglu hafi verið mikilvæg í málinu og mjög eðlileg þar sem málið væri mjög umfangsmikið. Niðurstöðukafli greinargerðarinnar, sem var sérstaklega gagnrýndur, hafi  verið mjög mikilvægur. 

Hún viðurkenndi þó að vanda hefði mátt betur til verka en lögregla hafi verið undir miklu álagi við rannsókn málsins að klára hana og senda málið til ákæruvaldsins vegna tólf vikna tímaramma sem lögregla hafði. 

Þá féllst Kolbrún ekki á það að niðurstöðukafli í greinargerð lögreglunnar hafi verið óeðlilegur. Lögregla hafi rannsakað málið og rökstutt niðurstöður sínar með sönnunargögnum. 

Nokkrum dögum síðar hafi hann í skrslutöku viðurkennt að hafa hitt Claudiu einu sinni þennan dag, en samkvæmt gögnum málsins hittust þau einu sinni um kvöldið og einu sinni fyrr um daginn þar sem hann sýndi henni bíl í eigu Armandos. Murat hafi hins vegar neitað áfram að hafa hitt Angjelin þetta kvöld en svo játað að hafa hitt hann þegar hann sótti verkfæri til Angjelins. Murat hafi þá í skýrslutökum hjá lögreglu sagt ekki hafa hitt Shpetim þetta kvöld en þegar upptökur af þeim tveimur saman hafi verið bornar undir hann hafi hann viðurkennt að hafa hitt Shpetim. 

Svona hafi þetta gengið í öllum skýrslutökum að sögn Kolbrúnar, Murat hafi neitað en svo þegar eitthvað var borið undir hann sem sýndi fram á annað hafi hann snúið málflutningi sínum við. Auk þess hafi hann í öllum skýrslutökum hjá lögreglu neitað að hafa hitt Angjelin þetta kvöld en svo hafi hann fyrir dómi ekki útilokað að hafa hitt hann þetta kvöld. 

Sakfelling þremenninganna gæti leitt til þyngri dóms fyrir Angjelin

Þá hafi komið fram í skýrslu hjá Murat að þegar hann hafi hitt vini þeirra Armandos uppi á spítala nóttina sem Armando var myrtur hafi vinirnir lýst grun um að Angjelin hafi framið morðið. Fram hafi komið í skýrslu hjá þessum vinum að Murat hafi svarað þessum grunsemdum þeirra því að Angjelin gæti ekki hafa myrt Armando af því að hann væri norður í landi.   

Angjelin var 18. nóvember síðastliðinn sakfelldur fyrir morðið og dæmdur í sextán ára fangelsi fyrir það. Murat, Shpetim og Claudia voru öll sýknuð og er meginverkefni Landsréttar að ákvarða hlut og sekt þeirra í málinu. Ríkissaksóknari fór fram á að dómur Angjelin verði þyngdur og þremenningarnir dæmdir fyrir samverknað.

Verði þremenningarnir fundnir sekir er líklegt að dómur yfir Angjelin þyngdur. Er það vegna þess að verði þremenningarnir sakfelldir hefur dómurinn fallist á að morðið hafi verið skipulagt fyrirfram.

Fréttastofa hefur fjallað ítarlega um morðið í Rauðagerði og fylgdist náið með réttarhöldunum fyrir héraði. Lesa má allar fréttir sem skrifaðar hafa verið um málið á Vísi hér.

Fréttin var uppfærð klukkan 10:40 eftir að Kolbrún fjallaði um gagnrýni Geirs á greinargerð lögreglu fyrir héraðsómi.