Sport

Allt vitlaust vestanhafs eftir óhugnanlegt atvik: „Þetta getur drepið mann“

Valur Páll Eiríksson skrifar
Tagovailoa lá í um átta mínútur áður en honum var trillað af velli á sjúkrabörum.
Tagovailoa lá í um átta mínútur áður en honum var trillað af velli á sjúkrabörum. Andy Lyons/Getty Images

Tua Tagovailoa, leikstjórnandi Miami Dolphins í NFL-deildinni í amerískum fótbolta, var borinn af velli eftir þungt höfuðhögg í leik við Cincinnati Bengals í nótt. Óhugnalegar myndir sáust af honum eftir höggið en talið er að hann hafi jafnvel fengið annan heilahristing sinn á innan við viku.

Tagovailoa haltraði af velli í fyrri hálfleik í leik Miami og Buffalo Bills á sunnudaginn var eftir höfuðhögg, þar sem hann virtist eiga erfitt með að halda jafnvægi. Hann var þá skikkaður í svokallaða heilahristingsathugun þar sem óháður læknir á vegum NFL-deildarinnar þarf að skoða leikmann og segja til um ástand hans.

Honum var gefið grænt ljós á að halda áfram þar sem jafnvægisvandræði hans voru sögð stafa af bakmeiðslum. Tagovailoa sneri aftur í síðari hálfleik og kláraði leikinn sem Miami vann 21-19.

Margur var skeptískur á þá niðurstöðu læknanna og gagnrýndu að Tua skyldi hafa klárað þann leik. Leikmannasamtökin í NFL kröfðust þess að almennilegar rannsóknir yrðu gerðar á leikmanninum.

Hrollvekjandi atvik

Dolphins-liðið sagði hann hins vegar vera í lagi og hann byrjaði leikinn við Cincinnati í nótt, fimm dögum eftir högg sunnudagsins. Ekki var langt liðið á leikinn þegar hann var tæklaður harkalega af hinum tæplega tveggja metra háa og 150 kílóa þunga Josh Tupou í Bengals-liðinu.

Hér sjást fingur Tua Tagovailoa sperrtir og hann í svokallaðri skylmingastöðu, sem er algeng eftir hörð höfuðhögg sem þessi og eru merki heilahristings.Mynd/Twitter

Tua negldist í jörðina og steinlá í yfir átta mínútur. Fjölmargir hlúðu að honum á þeim tíma, áður en settur var á hann hálskragi og hann trillaður af velli á sjúkrabörum. Verst þóttu hins vegar viðbrögð hans beint eftir höggið þar sem hann fór í svokallaða skylmingaviðbragð (e. fencing response), sem er algeng eftir heilahristing. Hendur hans stífnuðu upp og fingurnir sperrtust og virtist hann ekki hafa stjórn á höndunum.

Er með hreyfigetu í öllum útlimum

Miami Dolphins sendi frá sér stuttorða tilkynningu á samfélagsmiðlum fljótlega eftir atvikið þar sem segir að Tua sé með meðvitund og hafi stjórn á útlimum sínum.

„Tua Tagovailoa hefur verið fluttur á sjúkrahús á staðnum til frekara mats. Hann er með meðvitund og er með hreyfigetu í öllum útlimum,“ sagði í tísti Dolphins.

Rúmri klukkustund síðar, skömmu eftir að leiknum lauk, sem fór 27-15 fyrir Bengals, sendu Dolphins frá sér aðra tilkynningu þess efnis að Tua hefði verið útskrifaður af spítala.

„Búist er við að Tua Tagovailoa verði útskrifaður af spítala og muni fljúga heim með liðinu í kvöld,“ sagði í seinna tísti Dolphins.

Dolphins brugðust Tua

Atvikið hefur vakið afar hörð viðbrögð. Fyrrum NFL-leikmennirnir Shannon Sharpe, Robert Griffin III og Rich Ohrnberger eru á meðal þeirra sem hafa tekið til máls á samfélagsmiðlinum Twitter.

Sharpe, fyrrum leikmaður Denver Broncos og Baltimore Ravens, sagði að Tagovailoa hefði alls ekki átt að vera á vellinum í gær: „Þetta eru alvarleg meiðsli. Tua átti ekki að vera á vellinum á fimmtudegi eftir sunnudaginn. Stundum þurfa leikmenn vernd frá sjálfum sér. Dolphins brugðust Tua,“

Ohrnberger talaði á svipuðum nótum, og þakkar fyrir að hafa verið settur til hliðar eftir heilahristing á sínum tíma.

„Ég er mjög þakklátur fyrir það í dag hvernig þjálfarar og læknalið Patriots meðhöndluðu heilahristing minn árið 2011. Ég var kominn á fætur, en þeir tóku þetta alvarlega og ég eyddi árinu á meiðslalistanum. Þeir björguðu mér frá sjálfum mér. Ég hefði flýtt mér aftur á völlinn hefðu þeir leyft mér það. Þeir gerðu það ekki,“

Griffin III, fyrrum leikmaður Washington Redskins, sagði þá: „Lið eiga alltaf að forgangsraða persónunnni fram yfir leikmanninn. Heilsan er mikilvægari en samkeppnisforskot. Að senda Tua út á völl snýst ekki um öryggi leikmanna, það snýst um lífsgæði,“

Hefði getað dáið

Tauga- og heilavísindamaðurinn Dr. Chris Nowinski tók þá einnig til máls á Twitter í gær. Hann hefur beitt sér í málum tengdum heilahristingi og stofnaði samtökin Concussion Legacy Foundation vestanhafs. Hann segir að tveir heilahristingar á fimm dögum geti ekki aðeins bundið enda á íþróttaferil, heldur dregið manneskju til dauða.

„Þetta er hörmung. Biðjið fyrir Tua. Rekið læknaliðið og þjálfarana. Ég spáði þessu og ég hata að ég hafi haft rétt fyrir mér. Tveir heilahristingar á fimm dögum geta drepið mann. Þetta getur bundið enda á feril. Hvernig erum við svona heimsk árið 2022,“ sagði Nowinski.

Gagnrýnin ekki ný af nálinni

NFL hefur sætt mikilli gagnrýni undanfarin ár vegna slakra viðbragða við höfuðmeiðslum leikmanna.

Nígerísk-bandaríski læknirinn Bennet Omalu setti hugtakið CTE fram í grein árið 2005 eftir að hafa rannsakað fyrrum NFL-leikmanninn Mike Webster, sem lést árið 2002 eftir að hafa hagað sér óvenjulega um nokkurt skeið áður en hann svipti sig lífi.

Fjölmargir leikmenn í NFL hafa sýnt einkenni CTE eftir að ferli þeirra lauk, sem hvað helst sýnir sig í snemmbúnum vitglöpum, ofbeldishneigðri hegðun og þunglyndi.

Árið 2015 féllst deildin á að greiða einn milljarð bandaríkjadala í bótagreiðslur til að leysa þúsundir málsókna fyrrum leikmanna sem þjáðust af tauga- eða heilaskaða.

NFL



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.