Maguire telur De Gea eiga sök á slöku gengi Man Utd á síðustu leik­tíð

Man United keyptir Maguire á metfé sumarið 2019 og varð hann um leið lykilmaður í liði Ole Gunnar Solskjær. Hann byrjaði alla leiki Man United og enska landsliðsins. Hann meiddist lítillega undir lok tímabils 2021 og missti af úrslitaleik Evrópudeildarinnar þar sem Man Utd tapaði gegn Villareal í vítaspyrnukeppni.

Hann missti af upphafi Evrópumótsins en kom svo inn og spilaði frábærlega er England fór alla leið í úrslit en tapaði þar í vítaspyrnukeppni gegn Ítalíu. Það var svo á síðustu leiktíð 2021-22 þegar það fór að halla undan fæti.

Það gekk ekkert upp hjá Man Utd og Harry var gerður að blóraböggli. Eftir að hafa verið alltaf til staðar fór miðvörðurinn að meiðast og spila illa í kjölfarið. Gagnrýnisraddir urðu háværari og háværari en alltaf spilaði Maguire. það er þangað til nú.

Maguire byrjaði í miðverðinum hjá Man Utd á þessari leiktíð eftir að Erik ten Hag tók við stjórnartaumunum. Eftir töp gegn Brighton & Hove Albion og Brentford var Harry hins vegar settur á bekkinn. Liðið fór á flug og hann spilaði ekkert í næstu leikjum sem unnust allir. Þegar hann fékk á ný tækifæri í Evrópudeildinni gegn Real Sociedad þá tapaði Man United aftur.

Man Utd hefur tapað öllum leikjunum sem hinn 29 ára gamli Maguire hefur byrjað á leiktíðinni og virðist sem slakar frammistöður hans á síðustu leiktíð hafi elt hann yfir á yfirstandandi tímabil. Nú gæti verið svo að landsliðssæti hans sé í hættu en Gareth Southgate hefur haft óbilandi trú á Maguire til þessa.

Íþróttamiðillinn ESPN fór nýverið yfir stöðu mála hjá Harry Maguire en það virðist sem leikmaðurinn sjálfur og þeir sem eru honum næstir séu ekki alveg sammála umræðu síðustu mánuða.

„Harry þarf hraða leikmenn í kringum sig en hefur ekki haft það. Ef þú myndir setja Rúben Dias (leikmann Manchester City) í vörnina hjá United og Harry í vörnina hjá City þá myndi Dias vera í vandræðum og Harry myndi njóta sín,“ sagði heimildarmaður náinn Harry í viðtali við ESPN.

„Harry hefur ekki átt góða 12 mánuði en hann hefur ekki fengið mikla hjálp frá þeim í kringum hann, þjálfurum eða leikmönnum – svo það er skiljanlegt að sjálfstraust hans hafi minnkað og frammistöður dalað,“ bætti heimildarmaðurinn við.

ESPN hefur einnig heimildir fyrir því að Maguire sé orðinn langþreyttur á samskiptaleysi David De Gea og þeirri staðreynd að markvöðurinn komi nær aldrei af marklínunni. Kennir miðvörðurinn þeirri staðreynd að hluta til um slakan varnarleik liðsins á síðustu leiktíð.

Ten Hag virðist hafa fundið lausn á þeim vandræðum með því að stilla þeim Raphaël Varane og Lisandro Martínez saman í miðverði. Hvort Southgate gefi öðrum tækifæri í leikjum Englands í Þjóðadeildinni eða haldi sig við Harry Maguire kemur í ljós á næstu dögum þegar enska landsliðið mætir Þýskalandi og Ítalíu.