„Mildi að engan sakaði“

Samúel Karl Ólason skrifar 21. september 2022 17:51

Frá aðgerðum sérsveitarinnar í Mosfellsbæ í dag. Vísir/Bjarni

Ríkislögreglustjóri segir hættuástandi hafa verið afstýrt í dag. Fjórir voru handteknir af sérsveit ríkislögreglustjóra en í yfirlýsingu segir að tveir þeirra hafi verið taldir vopnaðir og hættulegir og að handtökurnar snúi að skipulagðri glæpastarfsemi og vopnalagabrotum.

„Það er mildi að engan sakaði í aðgerðum lögreglu en handtaka fór skjótt og vel fram,“ segir í yfirlýsingu frá ríkislögreglustjóra. Þar segir að viðbúnaður hafi verið umfangsmikill og að hættuástandi hafi verið afstýrt.

Aðgerðir sérsveitarinnar eru sagðar hafa verið umfangsmiklar og farið fram víða á höfuðborgarsvæðinu. Meðal annars í Holtasmára í Kópavogi og í iðnaðarhverfi í Mosfellsbæ.

Sjá einnig: Sérsveitin í aðgerð á iðnaðarsvæði í Mosfellsbæ

Ríkislögreglustjóri segir málið tengjast yfirstandandi rannsókn á skipulagðri glæpastarfsemi og vopnalagabrotum.

Í áðurnefndri yfirlýsingu segir að rannsóknin sé „í höndum embættis ríkislögreglustjóra sem hefur það hlutverk að rannsaka öll þau brot sem snúa að landráði, broti gegn stjórnskipan ríkisins og æðstu stjórnvöldum þess.“

Samskiptastjóri ríkislögreglustjóra segir að engar frekari upplýsingar verði veittar um málið í dag.

Grunaðir um skipulagningu hryðjuverka Lögreglumál Mosfellsbær Kópavogur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.