Erlent

Neita að reyna að sanna hvort Trump hafi svipt leynd af gögnunum

Samúel Karl Ólason skrifar
Donald Trump, fyrrverandi forseti Bandaríkjanna.
Donald Trump, fyrrverandi forseti Bandaríkjanna. AP/Tom E. Puskar

Alríkisdómari sem fenginn var til að fara yfir opinber og leynileg gögn sem starfsmenn Alríkislögreglu Bandaríkjanna (FBI) tóku af Donald Trump, fyrrverandi forseta, í ágúst þrýsti á dómara Trumps í dómsal í dag. Hann vildi að þeir færðu sannanir fyrir því að Trump hefði svipt leynd af gögnum sem hann tók með sér úr Hvíta húsinu og hvaða gögn um væri að ræða.

Því neituðu lögmennirnir að svara á þeim grundvelli að Trump gæti þurft að nota málefnið um leynd gagnanna til að verjast ákæru frá dómsmálaráðuneytinu.

Raymond Dearie, dómarinn, gagnrýndi lögmennina og sagði að þeir gætu ekki „borðað kökuna og átt hana“.

Eins og frægt er lögðu starfsmenn Alríkislögreglu Bandaríkjanna (FBI) hald á mikið magn opinberra og leynilegra gagna í Mar-a-Lago, sveitaklúbbi og heimili Trumps í Flórída, þegar húsleit var gerð þar í ágúst. Trump vill meina að hann eigi muni og gögn sem hald var lagt á og einnig að trúnaður ríki um önnur gögn.

Lögum samkvæmt hefði Trump átt að afhenda Þjóðskjalasafni Bandaríkjanna öll opinber gögn í hans vörslu er hann flutti úr Hvíta húsinu í janúar í fyrra.

Á meðal gagnanna fundust rúmlega hundrað háleynileg skjöl en Trump hefur ítrekað haldið því fram að hann hafi átt gögnin og svipt leyndinni af leynilegum skjölum, sem hann gæti í raun gert sem forseti. Engar vísbendingar og engar skriflegar skipanir hafa þó litið dagsins ljós sem gefa í skyn að Trump hafi nokkurn tímann reynt að svipta leyndinni af gögnunum.

Dearie var fenginn til þess að fara yfir gögnin og reyna að segja til um hvað tilheyri Trump og hvað ekki.

Sjá einnig: Sammála um dómara sem getur farið yfir leynigögnin

Dearie fundaði með lögmönnum Trumps og saksóknurum í dag til að ákveða næstu skref í verkefni hans. AP fréttaveitan segir að búist sé við því að það muni taka einhverjar vikur ef ekki mánuði en í millitíðinni getur dómsmálaráðuneytið ekki haldið áfram yfirstandandi rannsókn á veru gagnanna í Mar-a-Lago.

Dómsmálaráðuneytið hefur áfrýjað þeim hluta úrskurðarins, með því markmiði að fá að halda rannsókninni áfram á meðan Dearie fer yfir gögnin.

Þegar lögmenn Trumps neituðu að svara spurningum Dearie um gögnin og færa fram sannanir fyrir því að leyndinni hefði verið svipt af þeim, sagði hann að ef svo væri og að dómsmálaráðuneytið sagði að gögnin væru enn leynileg, þá væri þeim hluta málsins í raun lokið.

Svar lögmannanna vakti furðu og þá sérstaklega með tilliti til þess að það voru þeir sem lögðu fram kröfu um að einhver yrði skipaður til að fara yfir gögnin og þeir sem tilnefndu Dearie til þess.

Sérfræðingar hafa gagnrýnt Aileen Cannon, dómarann sem úrskurðaði þeim í vil, harðlega fyrir ákvörðun hennar og sökuðu hana um að gefa Trump réttindi sem aðrir íbúar Bandaríkjanna hefðu ekki. Hún var skipuð í embætti af Trump, níu dögum eftir að hann tapaði forsetakosningunum gegn Joe Biden árið 2020.

Cannon hafði gefið Dearie frest til 30. nóvember til að klára verkefni sitt og sagt honum að leggja mesta áherslu á leynileg gögn sem fundust í Mar-a-Lago. Lögmenn Trumps fóru þó fram á að fresturinn yrði lengdur. Dearie sagðist þó ætla að klára fyrir 30. nóvember.


Tengdar fréttir

Trump skipar Íslandi í flokk þriðja heims ríkja

Donald Trump, fyrrverandi Bandaríkjaforseti, gagnrýnir að Bandaríkjaforseta hafi verið skipað á bekk með þriðja heims leiðtogum við útför Bretadrottningar í gær. Bandarísku forsetahjónin sátu rétt fyrir aftan þau íslensku í kirkjunni. Trump telur að Bandaríkin hafi mátt þola vanvirðu sökum þessa. 

Rann­saka hreppa­flutninga vonar­stjörnu repúblikana á hælis­leit­endum

Lögreglustjóri í Texas ætlar að kanna hvort að lög hafi verið brotin þegar ríkisstjóri Flórída lét fljúga tugum venesúelskra hælisleitenda þvert yfir landið til Massachusetts í síðustu viku. Vísbendingar hafa komið fram um að fólkið hafi verið beitt blekkingum um hvað biði þess þar.

Gefa ekki upp hvort þeir muni sætta sig við kosningaúrslit

Á annan tug frambjóðenda Repúblikanaflokksins í þing- og ríkisstjórakosningum í haust vilja ekki taka af tvímæli um hvort þeir samþykki úrslitin þegar talið hefur verið upp úr kjörkössunum. Stór hluti flokksins afneitar enn úrslitum forsetakosninganna árið 2020.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×