Innlent

Beiðni Erlu Bolladóttur um endurupptöku synjað

Kjartan Kjartansson og Fanndís Birna Logadóttir skrifa
Erla Bolladóttir.
Erla Bolladóttir. Vísir/Vilhelm

Endurupptökudómstóll hafnaði beiðni Erlu Bolladóttur um endurupptöku á Hæstaréttardómi frá árinu 1980 þar sem Erla var dæmd í þriggja ára fangelsi fyrir rangar sakargiftir í tengslum við Guðmundar- og Geirfinnsmálin. Dómstóllinn féllst ekki á það að Erla hafi verið beitt þrýstingi, líkt og hún hélt fram. 

Úrskurður Endurupptökudóms féll í síðustu viku en dómstóllinn féllst ekki á það að fram hafi komið ný gögn eða upplýsingar sem hefðu skipt verulegu máli fyrir niðurstöðu málsins eða að lögregla, ríkið, dómari eða aðrir hafi haft frammi refsiverða háttsemi við niðurstöðuna, svo sem að vitni hafi vísvitandi farið með rangt mál fyrir dómi. 

Þá hafi ekki verið verulegar líkur að sönnunargögn hafi verið rangt metin sem gætu haft áhrif, né að verulegir gallar hafi verið á meðferð málsins. 

Í ljósi þessa var skilyrðum til endurupptöku ekki fullnægt og beiðni Erlu hafnað. Til viðbótar þarf Erla að greiða skipuðum verjanda sínum ríflega þrjár milljónir króna í þóknun. 

Skilyrði til endurupptöku samkvæmt 228. grein laga um meðferð sakamála.

Ákærð fyrir að bendla Klúbbmennina við morðið

Forsaga málsins er sú að árið 2017 ákvað endurupptökunefnd að mál allra sakborninga í Guðmundar- og Geirfinnsmálunum skyldu fara aftur fyrir dómstóla. Mál Erlu var þó ekki þar á meðal og í kjölfarið stefndi hún íslenska ríkinu. 

Í upphafi árs 2022 ógilti Héraðsdómur Reykjavíkur fyrri úrskurð endurupptökunefndar með þeim rökum að við sakfellingu hafi ekki legið fyrir næg gögn sem væru hafin yfir allan vafa. Íslensk stjórnvöld tilkynntu þá að þau myndu ekki áfrýja úrskurðinum. 

Hún fór aftur fram á endurupptöku í mars en ríkissaksóknari lagðist þá gegn umsögninni, þar sem ekki hafi verið sýnt fram á að skilyrði fyrir endurupptöku væru fyrir hendi.

Fréttastofa ræddi við Erlu þegar Héraðsdómur Reykjavíkur komst að niðurstöðunni í janúar en viðtalið má finna í spilaranum hér fyrir neðan.

Líkt og áður segir var hún sakfelld fyrir rangar sakagiftir ásamt Kristjáni Viðari og Sævari Marínó árið 1980 með því að bera árið 1976 á hina svokölluðu Klúbbmenn, Magnús Leópoldsson, Einar Gunnar Bollason, Valdimar Olsen og Sigurbjörn Eiríksson, að þeir hafi átt hlut í dauða Geirfinns. 

Hún hlaut þriggja ára fangelsisdóm fyrir vikið, að frádreginni gæsluvarðhaldsvist, en hún var sýknuð af ákæru fyrir hlutdeild í manndrápi. 

Árið 2018 voru hinir fimm sakborningarnir sem ákærðir voru fyrir að hafa orðið Guðmundi og Geirfinni Einarssyni að bana árið 1974, þeir Guðjón Skarphéðinsson, Kristján Viðar Júlíusson, Tryggvi Rúnar Leifsson, Sævar Marinó Cieselski og Albert Klahn Skaftason, sýknaðir. 

Hægt er að lesa úrskurð Endurupptökudóms í heild sinni hér. 

Fréttin hefur verið uppfærð.


Tengdar fréttir

Ríkið leggst gegn endurupptöku á máli Erlu Bolladóttur

Settur ríkissaksóknari leggst gegn endurupptöku á máli Erlu Bolladóttur. Lögmaður Erlu furðar sig á umsögninni í ljósi fyrri yfirlýsinga stjórnvalda. Erla segir umsögnina áfall og lýsandi fyrir það virðingarleysi sem henni hafi verið sýnt.

Erla hefur farið fram á endurupptöku

Erla Bolladóttir, einn sakborninga í Guðmundar- og Geirfinnsmálinu, hefur farið fram á endurupptöku máls síns. Verði fallist á endurupptökubeiðnina verður mál hennar flutt að nýju í Hæstarétti. Þetta staðfestir Ragnar Aðalsteinsson lögmaður Erlu í samtali við fréttastofu. 

Stjórnvöld ætla ekki að áfrýja

Íslensk stjórnvöld ætla ekki að áfrýja ógildingu Héraðsdóms Reykjavíkur á úrskurði endurupptökunefndar í máli Erlu Bolladóttur. Það þýðir að hún geti farið með sitt mál fyrir nýjan endurupptökudómstól og þaðan í Hæstarétt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.