Nígerískar landsliðskonur bíða enn eftir greiðslum

Deilur leikmanna liðsins við NFF og íþróttamálaráðuneytið hefur staðið yfir í nokkurn tíma. Leikmenn nígeríska liðsins gengu svo langt að fara í verkfall frá æfingum á meðan Afríkumótinu stóð.

Leikmenn liðsins eiga inni 10.000 dollara hver, sem samsvarar tæplega 1,4 milljónum króna. Meðal þess sem leikmennirnir áttu að fá greitt fyrir voru bónusar fyrir sigra sína á leið liðsins í undanúrslit Afríkumótsins.

Talsmenn NFF segja að leikmennirnir fá greitt á næstu dögum, en einn leikmaður liðsins segir þó að þær hafi fengið að heyra margar mismunandi lygar um greiðslurnar hingað til.

Ekki nýtt vandamál

Þetta er ekki í fyrsta skipti sem leikmenn nígeríska kvennalandsliðsins í knattspyrnu fá ekki greitt fyrir vinnu sína. Nígería er sigursælasta kvennalandslið Afríku, en þrátt fyrir það hefur liðið ítrekað þurft að berjast fyrir launum sínum.

Í tvígang hefur nígeríska kvennalandsliðið tekið upp á því að loka sig inni á hóteli til að mótmæla ógreiddum launum. Í bæði skiptin var það einmitt á Afríkumóti kvenna.

Fyrra skiptið var árið 2004 eftir að liðið tryggði sér sigur á Afríkumótinu í Suður-Afríku og það seinna eftir að liðið tryggði sér sinn áttunda titil í Kamerún árið 2016.

Þá gerði liðið slíkt hið sama árið 2019 þegar leikmenn liðsins fengu ekki greitt fyrir þátttöku sína á HM í Frakklandi þar sem liðið féll úr leik í 16-liða úrslitum.