Fótbolti

Böðvar spilaði í dramatískum sigri

Arnar Geir Halldórsson skrifar
Böðvar Böðvarsson í búningi Trelleborg.
Böðvar Böðvarsson í búningi Trelleborg. mynd/trelleborg

Böðvar Böðvarsson og félagar í Trelleborg eru í góðum málum í sænsku B-deildinni í fótbolta.

Böðvar var á sínum stað í byrjunarliði liðsins þegar það heimsótti Norrby.

Útlitið var gott fyrir Böðvar og félaga, sem eru í harðri toppbaráttu, því þeir náðu tveggja marka forystu snemma í síðari hálfleik. 

Norrby, sem er í neðri hluta deildarinnar, neitaði að gefast upp á heimavelli og náði að jafna metin þegar tæplega tíu mínútur lifðu leiks.

Trelleborg náði hins vegar inn sigurmarki þegar fimm mínútur voru komnar fram yfir venjulegan leiktíma og dramatískur 2-3 sigur Böðvars og félaga staðreynd.

Böðvar lék allan leikinn. 

Trelleborg situr í öðru sæti sænsku B-deildarinnar, fjórum stigum á eftir toppliði Halmstad.




Fleiri fréttir

Sjá meira


×