Fótbolti

Aftur meiddist markvörður íslenska landsliðsins á æfingu á EM

Óskar Ófeigur Jónsson skrifar
Telma Ívarsdóttir, einn af þremur markvörðum Íslands, meiddist á æfingu í Crewe í dag.
Telma Ívarsdóttir, einn af þremur markvörðum Íslands, meiddist á æfingu í Crewe í dag. Vísir/Vilhelm

Það á ekki eftir markvörðum íslenska kvennalandsliðsins að ganga á Evrópumótinu í Englandi því nú er annar markvörður liðsins meiddur eftir æfingu liðsins.

Þorsteinn Halldórsson, þjálfari íslenska landsliðsins, sagði frá því á blaðamannafundi i dag að Telma Ívarsdóttir, markvörður úr Breiðabliki, hafi meiðst á æfingu fyrr um daginn.

Cecilia Rán Rúnarsdóttir verður ekkert með íslenska liðinu á mótinu eftir að hafa puttabrotnað tveimur dögum fyrir fyrsta leik. Í stað hennar kom Auður Sveinbjörnsdóttir Scheving inn í hópinn.

Það lítur út fyrir að þetta sé hættulegasta staðan í íslenska hópnum því allir útileikmenn liðsins eru heilir og klárir í leikinn á móti Ítalíu á morgun.

Þorsteinn sagði frá því á fundinum að Telma hefði farið myndatöku eftir æfinguna en hann hafði ekkert frétt meira af því þar sem hann var bæði á leiðinni til Manchester sem og hann var upptekinn í viðtölum við blaðamenn.

Þorsteinn mun frétta meira af meiðslum Telmu á eftir og þá kemur í ljós hvort hann þurfi að gera aðra breytingu á markmannshópi íslenska liðsins á þessu Evrópumóti.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.