Geisla­baugurinn bjargaði lífi for­múlu­­kappans í gær

Kínverski ökumaðurinn Zhou Guanyu er í heilu lagi og var hleypt fljótlega af sjúkrahúsinu þrátt fyrir að renna tugi metra á haus, enda á því að fljúga yfir öryggisgarð og lenda á grindverkinu langt fyrir utan brautina.

Þeir sem sáu atvikið höfðu skiljanlega miklar áhyggjur af afdrifum Zhou en hann sagði síðan frá því á samfélagsmiðlum að það væri í lagi með sig og því þakkaði hann einu nýjasta öryggisatriði formúlu bílanna.

Hér fyrir neðan má sjá þennan svakalega árekstur.

„Ég er í lagi og útskrifaður. Geislabaugurinn bjargaði lífi mínu. Takk allir fyrir allar vingjarnlegu kveðjurnar,“ skrifaði Zhou Guanyu og er hann þar að tala um hringinn sem er fyrir ofan höfuð ökumannsins og hefur verið skylda frá árinu 2018.

Þetta var enn eitt dæmið um það að þetta mikilvæga öryggisatriði hafi bjargað ökumanni en annað gott dæmi er þegar Max Verstappen og Lewis Hamilton lentu í árekstri á Ítalíu í fyrra og hjólið á bíl Max lenti ofan á geislabauginum fyrir ofan höfuð Hamilton. Það hefði ekki þurft að spyrja að leikslokum ef Hamilton hefði ekki verið með geislabauginn fyrir ofan sig.

Carlos Sainz vann breska kappaksturinn í gær en hann ræddi atvikið með Guanyu eftir keppnina.

„Það er klikkun að hann hafi komið ómeiddur út úr þessu. Það er hreinlega ótrúlegt að það sé hægt. Það sýnir bara að þó að við gagnrýnum stundum FIA þá verðum við að gefa þeim það að þeir hafa hjálpað okkur mikið,“ sagði Carlos Sainz en hann var á því eins og fleiri að þarna hafi þetta öryggisatriði bjargað lífi Zhou Guanyu.