Skil mjakast norðaustur yfir landið

Atli Ísleifsson skrifar 25. mars 2022 07:10

Á Suðvesturlandi verður talsvert hlýrra og rigning en austar á landinu. Vísir/Vilhelm

Skil mjakast norðaustur yfir landið í dag og fylgja þeim austan og suðaustan tíu til átján metrar á sekúndu og slydda eða snjókoma. Reikna má með hægari vindi um landið austanvert og að víða verði vægt frost.

Í hugleiðingum veðurfræðings segir að á Suðvesturlandi verði hins vegar talsvert hlýrra og rigning, en í öðrum landshlutum hláni ekki fyrr en síðdegis eða í kvöld.

„Suðvestan og sunnan strekkingur eða allhvass vindur á morgun, hvassast í vindstrengjum norðanlands. Væta víða um land, samfelld rigning eða súld sunnantil á landinu en annars staðar verður úrkoman slitróttari. Hlýtt í veðri, hiti fer líklega allvíða yfir 10 stig á Norður- og Austurlandi.

Á sunnudag snýst svo í norðan kalda eða stinningskalda með lítilsháttar éljum og vægu frosti, en sunnan heiða verður yfirleitt þurrt og hiti 2 til 7 stig.“

Veðurhorfur á landinu næstu daga

Á laugardag: Suðvestan og sunnan 10-18 m/s, hvassast N-lands. Rigning eða súld S-til, annars dálítil væta með köflum. Hiti 4 til 11 stig.

Á sunnudag: Snýst í norðan 5-13 með lítilsháttar snjókomu, frost 0 til 6 stig. Bjart með köflum sunnan heiða og hiti 2 til 6 stig yfir daginn.

Á mánudag: Austan og norðaustan 3-10 og skýjað með köflum, en 8-15 og lítilsháttar væta við S-ströndina. Frost 0 til 7 stig, en frostlaust S-til.

Á þriðjudag: Norðaustlæg átt og dálítil él um landið NA-vert, en bjart að mestu V-lands. Heldur kólnandi.

Á miðvikudag og fimmtudag: Breytileg átt og snjókoma eða slydda með köflum, en yfirleitt þurrt á N- og A-landi. Hiti um og undir frostmarki.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.