Barnavernd?

Með samþykki sóttvarnalæknis, að börnin verði sprautuð með Pfizer/BioNTeck (Comirnaty) vegna Covid-19, er vafinn allur Pfizer/BioNTec í vil en ekki barnanna og þeirra nánustu. Lyfjaframleiðandinn nýtur friðhelgis. Skaðabætur verða greiddar úr ríkissjóði. Þetta er hinn bitri sannleikur, þrátt fyrir fjölda tilkynninga til Lyfjastofnunar vegna aukaverkana hjá 11 ára og eldri, sem einungis er toppurinn á ísjakanum. Vitað er af fjölda aukaverkana vítt og breitt um samfélagið sem ekki hafa verið tilkynntar. Tilkynntar aukaverkanir vegna Covid-sprautanna í heiminum eru orðnar miklu, miklu fleiri heldur en allir tilkynntir bóluefnaskaðar fram að þessu. Ekki er að sjá nein ákvæði í barnaverndarlögum varðandi rétt barna gagnvart ríkisvaldinu, sóttvarnalækni.

Lærdómurinn af svínaflensubólusetningunum

Núverandi sóttvarnalæknir, Þórólfur Guðnason og forveri hans Haraldur Briem, mæltu báðir með bólusetningu gegn svínaflensunni 2009-10. Ríkið greiddi þremur ungum stúlkum bætur árið 2013, 10 milljónir króna hverri vegna þess að þær fengu drómasýki í kjölfarið. Ungar konur í Svíþjóð fóru sérstaklega illa út úr svínaflensubólusetningunni. Þrátt fyrir þetta hafnaði fyrrum landlæknir, Sigurður Guðmundsson algerlega tengslum þar á milli í viðtali við Sigmar Guðmundsson í febrúar síðastliðnum. Hvernig ætli ungu konunum líði, þeim og öðrum sem ekki fengu bætur? Ætli þau séu tilbúin að taka aðra áhættu nú? Ég efast um það, í það minnsta treysti ég ekki heilbrigðisyfirvöldum. Það traust verður erfitt að vinna til baka.

Akademískt frelsi eða kennivald?

Ekki hafa menn lært af reynslunni, mantran heldur áfram eins og ekkert hafi í skorist. Lítið fer fyrir vísindum heldur einkennist öll umræðan af kennisetningum. Ekkert heyrist frá háskólum landsins nema skilyrðislaust samþykki. Gott dæmi um þetta voru orð EiríksBergmanns prófessors í stjórnmálafræði við Háskólann í Bifröst þar sem m.a. var rætt um „bergmálsklefa‟ og „falskar fréttir‟. Þar sagði hann m. a. „…þegar einhverjir hópar sem trúa einhverju tilteknu, til að mynda því að bólusetningar séu hættulegar, trúa því raunverulega…‟ Ekki er von á góðu ef þessi orð spegla viðhorfin innan háskólasamfélagsins.

En sem betur fer á þetta ekki við um alla. Fyrrum formaður barnaverndarnefndar Garðabæjar, María Grétarsdóttir, hefur sent fyrirspurn til bæjaryfirvalda þar. Hún kallar eftir rökum fyrir þessum „bólusetningum‟; á grundvelli hverra rannsókna og hagsmuna. Ánægjuleg og þörf mótrödd gegn öllum þeim áróðri sem nú er í gangi. Hér er dæmi um slíkan áróður af hendi Ásgeirs Haraldssonar prófessors í barnalækningum og smitsjúkdómum. Hann fullyrðir: „Þetta er nýtt, betra og lengra þróað, þetta veldur minni aukaverkunum en gömlu bóluefnin sem mörg hver ollu frekari aukaverkunum, þannig að þetta er á allan hátt betra.‟ Ótrúlegar fullyrðingar miðað við þær fordæmalausu aukaverkanir sem þessar sprautur hafa valdið. Þar að auki er mjög ófaglegt að bera þessi „bóluefni‟ saman við þau hefðbundnu. Læknirinn er alls ekki hlutlaus samkvæmt vefmiðlinum Fréttinni .

Að auki var viðtal við Valtý Stefánsson Thors, barnasmitsjúkdómalækni á Landspítala í kvöldfréttum Sjónvarps. Þar fullyrti hann að þessi svokölluðu bóluefni virki, það hafi sýnt sig, væru örugg og því varla hægt að ákveða að sleppa þeim. Engin svokölluð rauð flögg hafi komið fram, bætti Valtýr við. Fréttamaðurinn spurði hvort verið sé að taka heildarhagsmuni samfélagsins fram yfir hag barnanna. Valtýr hafnaði því.

Þriðji læknirinn tjáði sig hvað þetta varðar í Sprengisandi á Bylgjunni þann 19. desember. Þar voru mættir Tómas Guðbjartsson hjartalæknir ásamt Arnari Þór Jónssyni lögmanni. Því miður voru fullyrðingar hjartalæknisins rakalausar og ómálefnalegar þar sem hann reyndi að rökstyðja mál sitt með alsendis óskyldum málum. En ómálefnalegar fullyrðingar setjast að á ólíklegustu stöðum eins og á æðstu stöðum vestrænna stjórnkerfa.

Hatursorðræða kanslarans

Ræða hins nýkjörna kanslaraÞýskaland, Olaf Scholz á löggjafarþingi landsins, var allt annað en björt og vakti mér hroll: „Það er alveg skýrt að við líðum ekki einhvern örlítinn minnihluta, marklausra öfgamanna sem reynir að láta allt þjóðfélagið lúta vilja sínum. Við svörum þessum fámenna minnihluta, þessu hatursfólki, sem ræðst á okkur öll með kyndlagöngum og hóta okkur ofbeldi og morðum, með öllum mætti okkar lýðræðislega réttarríkis. Lýðræðið er hægt að verja.‟ Er þetta raunveruleikinn sem við stöndum andspænis, hótanir og svívirðingar gagnvart fólki sem er að reyna að verja frelsi sitt? Þar að auki er þessi „fámenni minnihluti‟, sem kanslarinn nefnir, á þriðja tug milljóna, þeir sem ekki hafa þegið sprauturnar. Lágt er lagst að ata lýðræðinu auri með því að þykjast tala í nafni ríkis lýðræðis- og réttar. Tilgangurinn helgar meðalið. Forsætisráðherra Frakklands var á svipuðum slóðum þó mildari væri. Það er eins og allir séu að lesa upp úr sama handritinu, enginn eðlismunur. Það ætti að vekja ugg hjá fólki, ekki PCR-faraldurinn.

Upplýsingaóreiða sóttvarnarlæknis

Varla hefur það farið fram hjá nokkrum manni hversu upptekin stjórnvöld eru af upplýsingaóreiðu. Reyndar var nefnd stofnuð af forsætisráðuneytinu henni til höfuðs. Ekki farnaðist nefndinni sérstaklega vel því henni mistókst að setja bönd á þá upplýsingaóreiðu er hrundi af vörum sóttvarnalæknis fyrir stuttu. Erling Óskar Kristjánsson tók hana sérstaklega fyrir í grein hér á þessum miðli þann 21. desember. Einnig ræddi ÞorsteinnSiglaugsson þessa óreiðu sóttvarnalæknis. Þórólfur ofmat tíðni alvarlegra Covid-veikinda hjá börnum. Hann tvöfaldaði tölur í skýrslunni um innlagnir, gjörgæslumeðferð og dauðsföll barna. Ekkert barn á aldrinum 5-11 hefur lagst inn á spítala vegna Covid 19 á Íslandi en þau ættu að vera 12,6 miðað við hans útreikninga. Arnar Þór Jónsson lögmaður samtakanna Frelsi og ábyrgð telur rétt að sóttvarnalæknir íhugi afsögn. Höfum í huga að þetta er PCR-faraldur. Aldrei hafa svo mörg samfélög verið sett á hvolf í sóttvarnartilgangi vegna fólks sem er einkennalaust og fullfrískt.

Valdi fylgir ábyrgð

Valdi fylgir ábyrgð eins og við í Ábyrgri framtíð hömruðum á í kosningabaráttunni fyrir seinustu Alþingiskosningar. Fólk getur ekki skorast undan ábyrgð orða sinna og gjörða.

Nú skulum við koma okkur af þeim helvegi sem kanslari Þýskalands talaði svo óhuggulega fyrir. Landsmenn verða að endurheimta dómgreind sína og innsæi. Börnin eru berskjölduð, þau treysta á dómgreind okkar og visku. Okkur ber skylda að leita sannleikans í stað þess að láta stjórnvöld næra ótta okkar. Við getum ekki leyft það að í börnin okkar verði sprautað lyfi sem er á skilyrtu markaðsleyfi, lyfi sem er á tilraunastigi. Við getum ekki tekið mark á fullyrðingum sumra lækna sem fullyrða líkt og kennimenn um ágæti sprautanna, án nokkurra raka. Það er móðgun við heilbrigða skynsemi og frjálsa hugsun.

Höfundur er hættur störfum og var í framboði fyrir Ábyrga framtíð við seinustu Alþingiskosningar