Erlent

Norð­menn fá ekki norsk hand­rit sem Árni færði Dönum að gjöf

Atli Ísleifsson skrifar
Meðal handritanna er Fríssbók, Codex Frisianus, þar sem í er að finna Heimskringlu.
Meðal handritanna er Fríssbók, Codex Frisianus, þar sem í er að finna Heimskringlu. KU.dk

Danir hafa hafnað ósk Norðmanna um að fá afhent sjö handrit sem segja sögu norsks samfélags á öldum áður. Norðmenn fóru þess á leit síðasta sumar að fá afhent handritin með það í hyggju að þau yrði hluti af varanlegri sýningu á Þjóðarbókasafninu í Osló.

Það var handritasafnarinn Árni Magnússon sem færði Kaupmannahafnarháskóla handritin að gjöf árið 1730.

Abid Raja, fyrrverandi menningarmálaráðherra Noregs, fór þess á leit síðasta sumar við danska menningarmálaráðuneytið að fá alls tólf handrit afhent. Kaupmannahafnarháskóli hefur nú hafnað beiðninni um að afhenda Norðmönnum sjö handrit. 

Konunglega bókasafnið í Kaupmannahöfn hefur hins vegar samþykkt að lána Norðmönnum fimm handrit til sýningarinnar, að því er segir í frétt NRK

Anne Mette Hansen hjá Árnasafni í Kaupmannahöfn segir í samtali við DR að ákveðið hafi verið að hafna beiðninni þar sem ekki sé rétt að hafa handritin til sýninga í meira en þrjá mánuði þar sem hætta sé á að þau eyðileggist. Þá sé verið að rannsaka handritin við Kaupmannahafnarháskóla.

Aukaatriði í danskri sögu

Aslak Sira Myhre, forstjóri Þjóðarbókasafnsins í Noregi, segist hafa orðið fyrir miklum vonbrigðum með svar Dana. „Handritin eru aukaatriði í danskri sögu, en mjög mikilvæg norskri sögu.“

Meðal handritanna eru Sáttargjörð (Sættargjerda) sem er samningur milli kirkjunnar og norska ríkisins frá árinu 1277 og sömuleiðis Fríssbók, Codex Frisianus, þar sem í er að finna Heimskringlu.

Myhre segist ætla sér til Kaupmannahafnar til að ræða málið frekar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.