Innlent

Segja Vinnumálastofnun tvívegis hafa deilt netföngum skjólstæðinga í fjölpóstum

Hólmfríður Gísladóttir skrifar
Svo virðist sem viðtakendur fjölpósta frá Vinnumálastofnun hafi tvívegis á þessu ári getað séð netföng annarra sem fengu sama póst.
Svo virðist sem viðtakendur fjölpósta frá Vinnumálastofnun hafi tvívegis á þessu ári getað séð netföng annarra sem fengu sama póst. Vísir/Vilhelm

Vinnumálastofnun virðist tvívegis á þessu ári hafa deilt tölvupóstföngum skjólstæðinga sinna í fjölpóstum. Fyrra atvikið átti sér stað í júní en þá var um að ræða póst sem varðaði endurupptöku umsókna um greiðslur í sóttkví.

Seinna atvikið átti sér stað í október, þegar tölvupóstföng enskumælandi einstaklinga voru birt í fjölpósti um geðheilsumál.

Frá þessu greinir Fréttablaðið.

Í frétt blaðsins segir einnig að óvarlega hafi verið farið með persónuupplýsingar í Facebook-hópum á vegum Vinnumálastofnunar en aðgangstillingum í þeim hefur nú verið breytt.

Að sögn Unnar Sverrisdóttur, forstjóra Vinnumálastofnunnar, voru umrædd atvik tilkynnt til Persónuverndar og Vigdís Eva Líndal, sviðsstjóri hjá Persónuvernd, staðfestir það og segir málið í farvegi.

„Þetta er viðkvæmt mál fyrir marga og mér fyndist mjög óþægilegt ef þessi gögn kæmust í hendur fólks sem ég hef unnið með. Þetta gæti komið sér illa fyrir trúverðugleika minn í starfi og kemur sér illa fyrir fyrirtækið mitt og mig sem fagmann,“ hefur Fréttablaðið eftir einum þeirra sem urðu fyrir gagnalekanum.

Persónuvernd Netöryggi Vinnumarkaður
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið