Herra Hnetusmjör svarar Sigríði fullum hálsi: „Fyrrverandi ráðherra, höfum það á hreinu“

Það vakti misjöfn viðbrögð síðasta vor þegar rapparinn Herra Hnetasmjör, skírnarnafni Árni Páll Árnason, hótaði íslenskum stjórnvöldum að teppa Reykjanesbrautina frá Keflavíkurflugvelli ef frjálst flæði veirunnar yrði ekki heft með ráðstöfunum á landamærunum. Umræðan var eldfim á þeim tíma, stífar innanlandstakmarkanir gerðu landanum lífið leitt, enda bólusetningarhlutfallið mun lægra en nú.

Sagt var frá því í gærkvöldi að Árni sjálfur væri nú staddur ásamt fjölskyldu sinni í Lundúnum. Sigríður Á. Andersen fyrrverandi dómsmálaráðherra deildi frétt af því á Twitter og skrifaði: „Altso... Er þetta maðurinn sem vildi loka landamærum Íslands með ofbeldi? Fer núna úr eldrauðu Íslandi og hittir kannski fólk frá löndum þar sem nýgengi smita er mjög lágt.“

Fréttastofa sló á þráðinn til Englands.

Þarna gagnrýnir ráðherra, eða fyrrverandi ráðherra þig?

„Fyrrverandi ráðherra, já, höfum það á hreinu. Það kom eitthvað babb í bátinn þarna,“ segir Árni. 

Já, babb í bátinn, þar vísar Árni til afsagnar Sigríðar í tengslum við Landsréttarmálið árið 2019. Rapparinn deilir einnig skjáskotum á Instagram með fréttum um Sigríði, þar sem fjallað er um að dómaraskipan hennar hafi á sínum tíma brotið gegn Mannréttindasáttmála Evrópu - og þar með gert íslenska ríkið bótaskylt.

„Mér finnst þetta bara fyndið. Mér finnst alveg eðlilegt að vera að ferðast þegar maður er fullbólusettur og fylgir öllum reglum,“ segir Árni. 

Staðan kannski breytt frá því þegar þú varst með aðrar kröfur í sambandi við landamærin? 

„Það er svona helsti munurinn,“ segir Árni.

Þannig að þú gefur lítið fyrir þessa gagnrýni á þessari stundu?

„Já, ég er ekki að taka þessi ummæli frá fyrrverandi ráðherra og fráfarandi þingmanni inn á mig,“ segir Árni, sem er staddur ásamt unnustu sinni Söru Linneth í Lundúnum. 

Í Englandi er rapparinn að fagna útskrift systur sinnar í Derby, sem er að útskrifast með meistaragráðu í afbrotafræði með áherslu á kynferðisbrot gegn börnum.