Þjóðveginum lokað fyrir norðan vegna alvarlegs umferðarslyss

Að því er kemur fram í færslu lögreglunnar á Facebook varð annars vegar umferðarslys á Moldhaugnahálsi og hins vegar bílvelta við Staðarbakka.  

Slysið á Moldhaugnahálsi var alvarlegt en  þar höfðu tveir bílar lent saman. Ökumenn beggja bílanna og farþegi í öðrum bílnum voru fluttir á sjúkrahúsið á Akureyri. 

Á Staðarbakka hafði gámaflutningabíll oltið en ökumaður og farþegi voru í bílnum þegar hann valt. Meiðsl þeirra virðast þó minniháttar að sögn lögreglu. 

Þrátt fyrir að tilkynnt hafi verið um slysin tvö á sama tíma eru þau ótengd. Hringvegurinn um Moldhaugnahálsinn er nú lokaður en opið er fyrir hjáleið um Skjaldavík.

Í framhaldi af því að bílar fóru að aka hjáleiðina um Skjaldavík valt stór vöruflutningabíll. Samkvæmt upplýsingum frá lögreglu gaf vegkantur sig og vörubíllinn lagðist á hliðina. Ekki urðu slys á fólki.

Fréttin hefur verið uppfærð.