Veður

Gular við­varanir sunnan­lands vegna hvass­viðris í dag

Atli Ísleifsson skrifar
Vindakortið fyrir klukkan 16 í dag. Spáð er miklu hvassviðri sunnantil í dag.
Vindakortið fyrir klukkan 16 í dag. Spáð er miklu hvassviðri sunnantil í dag. Veðurstofan

Nú í morgunsárið verður frekar bjart og kalt með hægum vindum á norðanverðu landinu. Fyrir sunnan er hins vegar austangola, skýjað að mestu og er hitinn kominn yfir frostmark. Gular viðvaranir taka gildi um hádegisbil á sunnanverðu landinu.

Á vef Veðurstofunnar segir að í dag muni áfram hvessa og eftir hádegi verði austan tíu til átján metrar á sekúndu, en átján til 25 metrar allra syðst með rigningu. Er gert ráð fyrir hvössum vindhviðum, 35 til 40 metrum á sekúndu bæði undir Eyjafjöllum og í Öræfum.

„Slíkir vindar eru varasamir ökutækjum sem taka á sig mikinn vind og þess vegna er gular viðvaranir í gildi fyrir sunnanvert landið [Suðurland, Suðausturland og Miðhálendi]. Í kvöld mun draga hægt og rólega úr vindi sunnantil, en hvessa fyrir vestan með allt að 23 m/s og bætir í úrkomu fyrir austan. Hiti 2 til 9 stig, hlýjast á sunnanverðu landinu.

Gular viðvaranir taka gildi um hádegisbil á sunnanverðu landinu.

Á morgun er spáð norðaustlægri átt með rigningu og slyddu fyrir norðan, en skýjað með köflum og þurrt að kalla sunnantil. Heldur svalara á morgun.

Eftir morgundaginn er gert ráð fyrir lægðir suður og austur af landinu. Norðaustanátt og slydda eða snjókoma fyrir norðan og dálítil rigning eða slydda annars staðar. Hiti yfirleitt á bilinu 1 til 7 stig, hlýjast syðst.“

Landsmenn mega reikna með rigningu víða um land í dag og vindasömu veðri.Veðurstofan

Veðurhorfur á landinu næstu daga

Á miðvikudag og fimmtudag: Norðaustan 10-18 m/s og rigning eða slydda, hvassast um landið norðvestanvert, en hægari og lengst af úrkomulítið sunnanlands. Hiti 1 til 7 stig.

Á föstudag og laugardag: Ákveðin norðaustanátt norðvestantil og rigning eða slydda, en annars hægari og rigning af og til. Hiti 0 til 6 stig yfir daginn.

Á sunnudag: Norðlæg átt, skýjað og væta fyrir norðan, en þurrt að kalla sunnantil. Heldur kólnandi veður.

Á mánudag: Útlit fyrir norðaustlæga átt og sums staðar lítilsháttar slydda eða snjókoma. Fremur kalt í veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.