Jóhann Berg og félagar enn í leit að fyrsta sigrinum

Jóhann Berg Guðmundsson og félagar í Burnley eru enn í leit að fyrsta sigri tímabilsins í ensku úrvalsdeildinni eftir 2-0 tap gegn Englandsmeisturum Manchester City í dag.

Bernando Silva kom heimamönnum í City yfir strax á 12. mínútu, og staðan var því 1-0 þegar að flautað var til hálfleiks.

Kevin De Bruyne tvöfaldaði forystu heimamanna þegar um tuttugu mínútur voru til leiksloka og þar við sat.

Jóhann Berg kom inn á sem varamaður á 72. mínútu, en Burnley situr nú í næst neðsta sæti ensku úrvalsdeildarinnar með aðeins þrjú stig eftir átta leiki.

Manchester City er hins vegar í öðru sæti deildarinnar með 17 stig.