Guðjohnsen töfrar kláruðu fjögurra marka og þriggja stiga kvöld: Myndir

Íslenska liðið vann því báða leiki sína á móti Liechtenstein í þessari undankeppni og skoraði í þeim átta mörk.

Stefán Teitur Þórðarson kom íslenska liðinu í gang með laglegu skallamarki og tvær vítaspyrnur Albert Guðmundssonar gengu frá leiknum. Það var síðan Andri Lucas Guðjohnsen sem innsiglaði sigurinn eftir að hafa fengið stoðsendingu frá bróður sínum Sveini Aroni Guðjohnsen.

Sveinn Aron fiskaði líka vítið sem gaf þriðja markið og lagði því upp tvö mörk eftir að hafa komið inn á sem varamaður.

Andri Lucas hefur nú skorað tvö lagleg mörk í þeim fjórum leikjum þar sem hann hefur komið inn á sem varamaður í haust. Greinilega framtíðar markaskorari íslenska liðsins.

Það var líka gaman fyrir þá stuðningsmenn sem mættu í Laugardalinn í kvöld að sjá smá Guðjohnsen töfra og þetta gefur vonandi góð fyrirheit fyrir næstu ár.

Vilhelm Gunnarsson, ljósmyndari Vísis, var á leiknum á Laugardalsvellinum í kvöld og náði þessum flottu myndum hér fyrir neðan.