Innlent

Ætla að kenna Kananum að taka kaldhreinsað lýsi

Kristján Már Unnarsson skrifar
Þær Anna Sigríður Jörundsdóttir og Sigrún Sigurðardóttir stofnuðu Dropa í Bolungarvík ásamt Birgittu Baldursdóttur.
Þær Anna Sigríður Jörundsdóttir og Sigrún Sigurðardóttir stofnuðu Dropa í Bolungarvík ásamt Birgittu Baldursdóttur. Arnar Halldórsson

Þrjár konur, sem hófu lýsisframleiðslu í Bolungarvík, hafa fengið hæsta styrk Matvælasjóðs til að kenna Bandaríkjamönnum að taka lýsi. Hugmynd þeirra var þó upphaflega sú að framleiða lýsi fyrir gæludýr vestanhafs.

Í fréttum Stöðvar 2 var fyrirtækið Dropi heimsótt en það er á hafnarbakkanum í Bolungarvík. Það varð til árið 2012 þegar þær Anna Sigríður Jörundsdóttir, Birgitta Baldursdóttir og Sigrún Sigurðardóttir ákváðu að bregða sér í slorgallan eftir hagnýtt meistaranám við Háskóla Íslands.

Í vinnslusal Dropa í Bolungarvík.Arnar Halldórsson

Námsverkefni þeirra var að vinna með þorskalýsið. Upphaflega hugmyndin var að framleiða lýsi fyrir gæludýr í Bandaríkjunum. Það breyttist og þær ákváðu frekar að einbeita sér að mannfólkinu.

„Svo fórum við að lesa okkur til og sáum það hvernig lýsi er búið til í dag. Það er komið svo langt frá sínum uppruna. Við ákváðum að reyna að útbúa lýsi eins og það var gert nánast í gamla daga,“ segir Sigrún.

Að þeirra sögn felst munurinn í því að lýsið er kaldunnið en ekki soðið. Hráefnið gerist vart ferskara því það fæst samdægurs frá smábátum sem landa í Bolungarvík.

„Við tökum bara af dagróðrabátum og erum þannig með ferska lifur. Við þurfum ekki að bragðhreinsa eða lyktarhreinsa,“ segir Anna Sigríður.

Lýsispillur settar í glös.Arnar Halldórsson

Fyrir vikið segja þær vítamínin varðveitast betur.

„Þú þarft bara eina teskeið af okkar lýsi. Því að öll upprunalegu vítamínin eru í. Og A-vítamín er hátt og þá takmarkast það við eina teskeið,“ segir Sigrún.

Þær hafa til þessa mest selt til Bandaríkjanna í gegnum netverslanir en hafa núna fengið styrk úr Matvælasjóði, þann hæsta í ár, til að koma lýsinu í smásöluverslanir vestanhafs. „Hrein fiskiolía í vesturvíking“ heitir verkefnið og er skráð á True Westfjords ehf., framleiðslufyrirtæki Dropa.

„Okkur var úthlutað 25,5 milljónum í markaðsstarf. Mjög þakklátar og bara skiptir sköpum fyrir okkur,“ segir Anna.

Dropi býður upp á hreint þorskalýsi en einnig lýsi með mismunandi bragðefnum.Arnar Halldórsson

Og til að auðvelda Kananum að taka lýsi bjóða þær einnig lýsispillur og lýsi með bragðefnum, eins og fennel, engifer og myntu. En eiga þær eftir að verða ríkar á þessu?

„Vonandi einhvern tímann,“ svarar Sigrún og Anna kinkar kolli brosandi.

Hér má sjá frétt Stöðvar 2:


Tengdar fréttir

Þróa nýtt lyf úr þorskalýsi

Sprotafyrirtækið Lipid Pharmaceuticals hefur fengið einkaleyfi víða um heim á nýtingu frírra omega-3 fitusýra úr sjávarafurðum til lyfjagerðar. Fyrsta lyf fyrirtækisins verður sett á markað innan þriggja ára.

Íslenska lýsið stóðst prófið

Íslenskar fiskolíur fengu toppeinkunn frá vísindamönnum Matís sem fréttastofa Stöðvar 2 fékk til að kanna. Í dönskum neytendaþætti komu þær ekki vel út en líklegt þykir að danskir fréttamenn hafi ruglað saman viðmiðum sem eigi við við jurtaolíu en ekki olíu úr fiski.

Anna ekki eftirspurn eftir lýsi

Eftirspurn eftir þorskalýsi um allan heim hefur aukist svo mikið að Lýsi hf. vantar nú meiri lifur til að anna eftirspurn. Þetta þakka Lýsismenn markvissu markaðsstarfi síðustu ára sem hefur skilað sterkri stöðu fyrirtækisins á erlendum mörkuðum.

Hægðalosandi lyf unnið úr þorskalýsi

Íslenska sprotafyrirtækið Lipid Pharmaceuticals (LP) vinnur nú að þróun lyfs gegn hægðatregðu í samvinnu við Lýsi hf. Lyfið er í formi endaþarmsstíla en grunnhráefnið í lyfinu er íslenskt þorskalýsi. Að sögn Orra Þórs Ormarssonar, læknis og aðalrannsakanda verkefnisins, eru farnar nýjar leiðir í fullvinnslu íslenskrar sjávarafurðar og verðmætasköpunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.