Grunnskólanum lokað vegna gruns um smit

Atli Ísleifsson skrifar 15. september 2021 13:44

Grunur leikur á Covid-19 smiti í grunnskólanum á Reyðarfirði og hefur því verið ákveðið að loka skólanum í dag meðan unnið er að kortlagningu mögulegs smits.

Lögreglan á Austurlandi segir frá þessu á heimasíðu sinni, en ákveðið var að skima 1. til 3. bekk skólans og allt starfsfólk og fór sú sýnataka fram heilsugæslunni á Reyðarfirði í hádeginu.

„Aðrir nemendur skólans, forráðamenn eða ættingjar barna í skólanum sem hafa einkenni sem geta bent til Covid-19 eru einnig hvattir til þess að mæta í sýnatöku í dag,“ segir í tilkynningunni.

Þá segir að aðgerðastjórn fylgist með gangi mála og muni senda út aðra fréttatilkynningu þegar niðurstöður sýnatöku liggja fyrir.

„Nú, sem aldrei fyrr, er mikilvægt að þeir sem sýna einkenni sem geta bent til Covid-19 (hiti, hósti, kvef, hálssærindi og fleira) haldi sig heima og bóki sér tíma í einkennasýnatöku. Reyðfirðingar, sem og aðrir, eru hvattir til að sinna vel persónubundnum sóttvörnum og notfæra sér það sem við höfum lært varðandi smitvarnir.“

Faraldur kórónuveiru (COVID-19) Fjarðabyggð Grunnskólar Skóla - og menntamál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.