Íslenski boltinn

Tíu Kórdrengir héldu lífi í toppbaráttunni

Hjörtur Leó Guðjónsson skrifar
Kórdrengir halda enn í vonina um sæti í efstu deild.
Kórdrengir halda enn í vonina um sæti í efstu deild. Vísir/Hulda Margrét

Fimm leikir fóru fram í Lengjudeild karla í dag. Alex Freyr Hilmarsson var hetja Kórdrengja þegar að liðið vann Grindavík 2-1, Afturelding vann 3-1 sigur gegn Þrótti R., tíu leikmenn Fram kláruðu 2-1 sigur gegn Gróttu, Selfyssingar tryggðu áframhaldandi veru í deildinni með 3-0 sigri gegn Víkingi Ólafsvík og Þór frá Akureyri og Fjölnir gerðu markalaust jafntefli.

Connor Mark Simpson skoraði fyrsta mark leiksins fyrir Kórdrengi gegn Grindvíkingum eftir hálftíma leik og staðan var því 1-0 þegar flautað var til hálfleiks.

Arnleifur Hjörleifsson fékk að líta sitt annað gula spjald á 55. mínútu og þar með rautt spjald. Grindvíkingar nýttu sér liðsmuninn því á 88. mínútu varð Fatai Adebowale Gbadamosi fyrir því óláni að skora sjálfsmark og því stefndi í 1-1 jafntefli.

Alex Freyr Hilmarsson reyndist þó hetja Kórdrengja þegar hann skoraði sigurmarkið á lokamínútu leiksins. Kórdrengir eru því með 34 stig í þriðja sæti, aðeins einu stigi á eftir ÍBV í öðru sætinu. Eyjamenn hafa þó spilað tveimur leikjum minna.

Kári Steinn Hlífarsson kom Aftureldingu yfir gegn Þrótti strax á þriðju mínútu, en Samuel George Floyd jafnaði metin eftir rúmlega klukkutíma leik.

Tvö mörk frá Arnóri Gauta Ragnarssyni sáu þó til þess að Afturelding tók stigin þrjú. Þróttarar eru níu stigum frá öruggu sæti þegar níu stig eru í pottinum og þurfa því á kraftaverki að halda ef þeir ætla sér að spila í Lengjudeildinni á næsta tímabili.

Það tók topplið Fram aðeins sjö mínútur að brjóta ísinn gegn Gróttu, en það var Þórir Guðjónsson sem kom heimamönnum yfir.

Gunnar Gunnarsson fékk beint rautt spjald eftir tæplega hálftíma leik og Framarar þurftu því að spila manni færri í rúman klukkutíma.

Gabríel Hrannar Eyjólfsson jafnaði metin fyrir Gróttu þegar um 20 mínútur voru til leiksloka, en Haraldur Einar Ásgrímsson tryggði Fram 2-1 sigur á 81. mínútu.

Selfyssingar tryggðu sæti sitt í deildinni með 3-0 sigri gegn Víkingum frá Ólafsvík, og felldu Víkinga í leiðinni.

Valdimar Jóhansson kom Selfyssingum yfir eftir hálftíma leik og Aron Einarsson og Gary Martin tryggðu sigurinn með sitthvoru markinu í seinni hálfleik.

Hvorki Þór frá Akureyri né Fjölnismenn náðu að finna netmöskvana þegar að liðin mættust fyrir norðan í dag. Mikilvægt stig fyrir Þórsara sem eru nú hársbreidd frá því að tryggja sæti sitt í deildinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.