Þrír bræður fórust í bílslysi í Noregi

Atli Ísleifsson skrifar 25. ágúst 2021 11:29

Slysið varð á þjóðvegi 7 milli Nesbyen og Hønefoss um klukkan 22 á mánudagskvöldið. Myndin tengist fréttinni ekki beint. Getty

Allt bendir til að þrír bræður – 17, 18 og 20 ára –hafi látið lífið í bílslysi í Hallingdal í Flå, um 150 kílómetra norðvestur af höfuðborginni Osló, á mánudagskvöldið.

Í norskum fjölmiðlum segir að lögregla eigi enn eftir að bera endanlega kennsl á lík þeirra sem fórust.

Bræðurnir áttu heima í Flå og Noresund og voru saman í bíl sem ekið var á þjóðvegi 7 í átt að Flå þegar hann rakst á vörubíl sem kom akandi úr gagnstæðri átt.

Slysið varð á þjóðveginum milli Nesbyen og Hønefoss um klukkan 22 á mánudagskvöldið.

Lögregla staðfesti í morgun að mikill eldur hafi komið upp í bílnum eftir áreksturinn.

Haft er eftir Knut Martin Glesne, sveitarstjóra í Krødsherad, í VG að um mikinn harmleik sé að ræða sem hafi áhrif á samfélagið allt. „Við höfum misst þrjá unga, góða stráka sem áttu framtíðina fyrir sér,“ segir Glesne.

Noregur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.