Golf

Anna Nor­dqvist fann loks styrkinn sem hafði vantað svo lengi og sigraði Opna breska

Runólfur Trausti Þórhallsson skrifar
Anna Nordqvist með bikarinn eftir að hafa unnið Opna breska meistaramótið í golfi.
Anna Nordqvist með bikarinn eftir að hafa unnið Opna breska meistaramótið í golfi. Warren Little/Getty Images

Sænski kylfingurinn Anna Nordqvist vann sitt þriðja risamót er hún landaði sigri á Opna breska meistaramótinu í golfi. Nordqvist hefur átt erfitt uppdráttar undanfarin ár og því var sigurinn einkar kærkominn. 

Sigurinn var mjög naumur enda mótið æsispennandi frá upphafi til enda. Þær Nordqvist og Nanna Koerstz Madsen frá Danmörku voru jafnar á níu höggum undir pari fyrir síðasta hringinn á Carnoustie-vellinum í Skotlandi.

Spennan hélt áfram allt fram á lokaholu mótsins þar sem Madsen lék á tveimur höggum yfir pari á meðan Nordqvist spilaði á pari og tryggði sér sigurinn. Það var stutt í næstu kylfingu, Madelene Sagström frá Svíþjóð og Georgiu Hall frá Englandi, en þær hirtu 2. sætið af Madsen sem féll alla leið niður í 5. sæti.

Nordqvist hrósaði hins vegar sigri en hún lék mótið samtals á 11 höggum undir pari. Þetta er fyrsta risamótið sem Nordqvist vinnur síðan hún landaði sigri á Evian-meistaramótinu árið 2017. Þar áður vann hún LPGA-risamótið árið 2009.

Í sigurræðu sinni viðurkenndi hin 34 ára gamla Nordqvist að undanfarin ár hafa tekið sinn toll andlega þar sem hún hefur hríðfallið niður heimslistann.

„Erfiðasti hlutinn var að missa bæði líkamlegt og andlegt úthald. Það tók mig rúmlega þrjú ár að jafna mg á því og á síðasta ári – meðan Covid var sem verst – þá náði ég loksins að setjast niður heima, slaka á og átta mig á hlutunum,“ sagði Nordqvist í sigurræðu sinni.

„Það var frábært að fá aðeins meiri tíma heima fyrir, þurfa ekki að ferðast hingað og þangað. Ég hefði þurft á þessu fríi að halda fyrir tveimur árum síðan. Ég var alltaf að reyna ýta mér áfram en fann ekki þennan auka gír sem ég hefði áður fyrr. Þegar hlutirnir urðu erfiðir gat ég venjulega komist í gegnum þá en svo allt í einu gat ég það ekki lengur.“

Nordqvist virðist þó hafa fundið þennan aukagír á nýjan leik þökk sé góðu baklandi og þá sagði hún að flutningar til Arizona hefðu hjálpað sér mikið.

„Ég elska að búa þar, fæ mikinn stuðning og svo er ég gift núna. Held að ég sé almennt mun glaðari utan vallar í dag en ég var áður. Það er gott jafnvægi í þessu,“ sagði Anna Nordqvist, sigurvegari á Opna breska meistaramótinu í golfi, að lokum.


Tengdar fréttir

Norðurlandabarátta fyrir lokahringinn á Opna breska

Hin sænska Anna Nordqvist lék besta hring mótsins á Opna breska meistaramótinu í golfi á Carnoustie-vellinum í Skotlandi í gær. Hún deilir forystunni með hinni dönsku Nönnu Koertz Madsen á afar jöfnu móti. Lokahringurinn fer fram í dag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.