Lífið

Tólf ára stúlka rakar af sér hárið fyrir gott mál­efni

Elma Rut Valtýsdóttir skrifar
Agla Björk er hugrökk, ung stúlka. Hún ætlar að raka af sér hárið á miðvikudaginn til styrktar Krafti.
Agla Björk er hugrökk, ung stúlka. Hún ætlar að raka af sér hárið á miðvikudaginn til styrktar Krafti. Facebook/Agla Björk Kristjánsdóttir

Hin tólf ára gamla Agla Björk Kristjánsdóttir setti sér það markmið að safna fimm hundruð þúsund krónum til styrktar stuðningsfélaginu Krafti og raka af sér hárið þegar markmiðinu væri náð. Kraftur stendur Öglu Björk nærri en hún missti föður sinn úr krabbameini fyrir fjórum árum.

Agla Björk setti söfnunina af stað á fimmtudaginn og á einum sólarhring var markmiðinu náð. Nú hafa safnast rúmar átta hundruð þúsund krónur. Söfnunin mun standa fram á miðvikudag en þá mun Agla Björk raka af sér hárið.

Allur peningurinn sem safnast mun renna óskiptur til Krafts, en hárið ætlar hún að gefa til samtakanna Locks of Love sem búa ti hárkollur fyrir börn sem hafa misst hárið vegna veikinda.

„Þegar ég fæddist var pabbi að klára lyfjameðferð og dó hann árið 2017 þegar ég var átta ára. Kraftur gaf okkur svo mikið og mig langaði til þess að gefa til baka og reyna að hjálpa þeim með því að halda söfnun,“ segir Agla Björk.

Agla Björk er með afar sítt, rautt og fallegt hár sem hún hefur safnað í mörg ár. Hún segist hafa hugsað málið vel og vandlega í nokkrar vikur en hana hafi lengi langað til þess að raka af sér hárið. 

„Ég er búin að vera í mánuð bara „Ertu viss um að þú viljir raka af þér hárið og ertu viss um að þú viljir ekki bíða til fermingu?“. Hún er sko að fermast næsta haust,“ segir Kristín Þórsdóttir, móðir Öglu Bjarkar.

Kristín segir dóttur sína þó hafa verið harðákveðna og er hún yfir sig stolt af henni.

„Hún sýnir náttúrlega bara ótrúlega mikið hugrekki að ætla raka af sér þetta fallega hár til þess að styrkja þetta góða málefni. En pabbi hennar var svona líka. Hann var rosalega ötull að safna fyrir mottumars á hverju einasta ári og safnaði mörgum milljónum. Ég sé það svo skýrt hvað hún er lík honum.“

Kristján Björn Tryggvason, faðir Öglu Bjarkar, greindist með heilaæxli árið 2006. Hann barðist við sjúkdóminn með hléum, þar til hann lést árið 2017. Fréttastofa tók viðtal við þau Kristján og Kristínu árið 2016.

„Hann var alveg rosa fyndinn og góður maður. Hann gerði mikið fyrir aðra og það var alltaf stutt í hláturinn,“ segir Agla Björk um föður sinn.

Hún segir Kraft standa fjölskyldunni afar nærri. Fjölskyldan naut góðs af þjónustu félagsins og fékk meðal annars greiðslu úr neyðarsjóði þess. Því segist Agla Björk gleðjast yfir því að geta gefið til baka.

Hárið fær að fjúka á miðvikudaginn klukkan eitt og verður sýnt frá því í beinni á Instagram síðu Krafts.

„Viðbrögðin eru búin að vera frábær. Ég er búin að fá alveg helling af skilaboðum og fullt af fólki að leggja inn pening. Ég er bara ótrúlega þakklát.“

Hægt er að leggja söfnuninni lið með því að leggja inn reikningsnúmer 0545-14-004255 og kennitala er 221008-4050.


Tengdar fréttir

Erfiðast að horfa á maka sinn hverfa

Kristín Þórsdóttir, eiginkona Kristjáns Björns Tryggvasonar, sem hefur ákveðið að hætta í meðferðum við heilakrabbameini finnst særandi þegar fólk talar um að þau séu hætt að berjast fyrir lífi hans. Þau standi frammi fyrir erfiðu vali sem þau óska engum að standa frammi fyrir. Meðferðirnar hafi verið átakanlegar og nú sé sjúkdómurinn á lokastigi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.