Ed Sheeran hélt tónleika fyrir enska landsliðið

Á miðvikudaginn fékk Sheeran að koma inn í búbblu enska landsliðsins og hélt litla útitónleika fyrir það í St. George's Park.

„Þetta spurðist fljótt út,“ sagði Jordan Henderson er hann var spurður út í tónleikana á blaðamannafundi.

„Hann er toppmaður, frábær náungi og allir vita hversu góður tónlistarmaður hann er. Það var frábært að fá hann til að spila nokkur lög. Þetta var góður dagur. Andrúmsloftið var afslappað, við grilluðum og hann lék nokkur lög.“

Englendingar unnu D-riðil Evrópumótsins án þess að fá á sig mark. Í sextán liða úrslitunum mæta þeir sínum fornu fjendum, Þjóðverjum, sem enduðu í 2. sæti F-riðils.

Leikur Englands og Þýskalands fer fram á Wembley, þar sem enska liðið hefur leikið alla sína leiki, á þriðjudaginn.

England og Þýskaland mættust síðast á stórmóti í sextán liða úrslitum HM 2010 þar sem Þjóðverjar unnu 4-1 sigur.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.