Liðin gerðu 1-1 jafntefli og eru því áfram taplaus en Valsmenn eru með tveggja stiga forskot á toppi deildarinnar, með 17 stig eftir sjö leiki.
Mörkin úr leiknum má sjá hér að neðan.
Færeyingurinn Kaj Leo í Bartalsstovu kom Val yfir með sínu fyrsta marki í sumar, með glæsilegu skoti eftir skyndisókn á 57. mínútu.
Víkingar reyndu hvað þeir gátu að jafna metin og þjálfarinn Arnar Gunnlaugsson sendi meðal annars miðvörðinn Sölva Geir Ottesen inn á til að skalla boltann í fremstu víglínu.
Seint í uppbótartíma leiksins fékk Víkingur svo hornspyrnu og þá hljóp jafnvel markvörðurinn Þórður Ingason fram. Með alla sína menn í eða við vítateiginn náðu Víkingar að jafna, þegar Nikolaj Hansen skoraði sitt fimmta mark í sumar.
