Lífið

Heimir og Sigurður náðu toppi E­verest-fjalls

Vésteinn Örn Pétursson skrifar
Heimir og Sigurður hafa náð toppi Everest með fána umhyggju með í för.
Heimir og Sigurður hafa náð toppi Everest með fána umhyggju með í för.

Fjallgöngumennirnir Heimir Fannar Hallgrímsson og Sigurður Bjarni Sveinsson hafa náð toppi Mount Everest, hæsta fjalls í heimi.

„Náðum báðir toppi Everest, Heimir og Siggi, og líður báðum vel,“ segir í skilaboðum sem Sigurður hefur sent frá sér í gegn um staðsetningarbúnað sinn.

Félagarnir tveir eru í áheitasöfnun fyrir Umhyggju, styrktarfélag langveikra barna. Þeir hafa verið í Nepal síðan 23. mars og í hæðaraðlögun í grunnbúðum Everest síðustu sex vikur.

Fyrir um þremur vikum varð tvíeykið fyrir nokkru áfalli, en Sigurður sneri sig illa á hné í æfingagöngu og þjáðist mjög á leið aftur í grunnbúðirnar.

Í samráði við sérfræðinga hér heima var tekin ákvörðun um að hann myndi verja fimm dögum í að styrkja hnéð. Það gekk þó ekki eftir og eftir sjö daga var hann enn sárþjáður og því flogið með hann til Katmandú, höfuðborgar Nepal, til að koma honum undir læknishendur.

Sigurður fór í sneiðmyndatöku og endurhæfing hófst. Hún gekk vonum framar og var hann fljótlega farinn að geta sett álag umfram eiginþyngd á hnéð. Fimm dögum síðar var ákveðið að snúa aftur í grunnbúðir.

Í umfjöllun um þá félaga fyrir viku síðan kom fram að þeir ætluðu sér að nýta veðurglugga milli 21. og 23. maí til að ná toppi Everest með fána Umhyggju með í för og viti menn, þeir hafa náð toppnum.

Eftirtaldir Íslendingar hafa komist á topp Everest (nafn og ártal):

  • Björn Ólafsson 1997
  • Einar Stefánsson 1997
  • Hallgrímur Magnússon 1997
  • Haraldur Örn Ólafsson 2002
  • Leifur Örn Svavarsson 2013 og 2019
  • Ingólfur Geir Gissurarson 2013
  • Vilborg Arna Gissurardóttir 2017
  • Bjarni Ármannsson 2019
  • Lýður Guðmundsson 2019
  • Heimir Fannar Hallgrímsson 2021
  • Sigurður Bjarni Sveinsson 2021



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.