Íslenski boltinn

Telur sína menn geta orðið Ís­lands­meistara í sumar

Runólfur Trausti Þórhallsson skrifar
Óskar Hrafn Þorvaldsson, þjálfari Breiðabliks.
Óskar Hrafn Þorvaldsson, þjálfari Breiðabliks. Vísir/Bára

Óskar Hrafn Þorvaldsson, þjálfari Breiðabliks, telur sína menn geta borið sigur úr býtum í Pepsi Max-deild karla í knattspyrnu í sumar. Liðið endaði í 4. sæti deildarinnar síðasta sumar er keppni var hætt þegar enn voru nokkrar umferðir eftir af mótinu.

Þetta kom fram í viðtali Óskars Hrafns í sjónvarpsþætti 433.is á Hringbraut í vikunni. Þar sagði Óskar:

„Breiðablik getur orðið Íslandsmeistari í sumar. Það er auðveldara að tala um það en erfiðara að spila eins og meistari, haga sér eins og meistari og vera meistari. Hvort sem það er á fótboltavellinum eða í daglegu lífi.“

„Við erum með betra lið. Leikmennirnir hafa þroskast mikið og við erum er í betra líkamlegu formi. Menn vita hlutverk sín betur og þær viðbætur sem við höfum gert á hópnum hafa verið góðar,“ bætti Óskar við.

Breiðablik seldi Brynjólf Andersen Willumsson til Noregs og þá fór Guðjón Pétur Lýðsson til ÍBV. Á móti kemur að þeir Davíð Örn Atlason, Finnur Orri Margeirsson, Jason Daði Svanþórsson og Árni Vilhjálmsson eru allir gengnir til liðs við Blika.

Varðandi leikstíl Breiðabliks

„Ég met þetta þannig að ef þú spilar frá aftasta manni hefurðu meiri stjórn stjórn á því hvað gerist heldur en þegar þú bombar boltanum fram. Við höfum lent í vandræðum þegar við spörkum langt,“ sagði Óskar Hrafn varðandi leikstíl Breiðabliks sem sumir telja áhættusaman.

Breiðablik mætir KR í fyrstu umferð Pepsi Max deildar karla þann 2. maí næstkomandi. Leikurinn verður í beinni útsendingu Stöðvar 2 Sport.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.