Fótbolti

Vilja breytingar á FIFA og segjast gera allt fyrir leik­menn sína

Runólfur Trausti Þórhallsson skrifar
Mino Raiola [t.v.] og Jonathan Barrett [t.h.] eru stór nöfn í fótboltaheiminum en þeir vinna sem umboðsmenn.
Mino Raiola [t.v.] og Jonathan Barrett [t.h.] eru stór nöfn í fótboltaheiminum en þeir vinna sem umboðsmenn. EFE/Alessandro Di Marco

Umboðsmennirnir Mino Raiola og Jonathan Barrett hafa sterkar skoðanir á flest öllu sem viðkemur knattspyrnu. Þá sérstaklega á Alþjóðaknattspyrnusambandinu, FIFA, og fjölmiðlum í Bretlandi.

Raiola og Barrett eru svokallaðir „ofurumboðsmenn“ enda með fjöldan allan af heimsklassa leikmönnum á sínum snærum. Þeir hafa því eðlilega mikið vægi þegar kemur að málum innan knattspyrnunnar.

Barett sá til að mynda til þess að Tottenham Hotspur fékk 100 milljónir evra fyrir Gareth Bale árið 2013 er Real Madrid festi kaup á kauða. Hann er að sama skapi ástæðan fyrir því að Bale er á jafn himinháum launum og raun ber vitni. 

Einnig eru leikmenn á borð við Jack Grealish, Mason Mount og Nick Pope á mála hjá umboðsstofunni ICM/Stellar sem Barrett á hlut í. Einnig eru þar ungir og efnilegir leikmenn á borð við Eduardo Camavinga, Ihrahima Konate og  Sergiño Dest.

Raiola er hvað frægastur fyrir að koma Paul Pogba frá Manchester United til Juventus og svo aftur til Man United á litlar 105 milljónir evra. Hann er einnig umboðsmaður Zlatan Ibrahimović, Erling Braut Håland, Matthijs de Ligt, Gianluigi Donnarumma, Ryan Gravenberch, Mario Balotelli og fleiri.

Barrett og Raiola ræddu allt milli himins og jarðar í ítarlegu viðtali við The Athletic nýverið.

Varðandi FIFA

Það kom fljótlega í ljós í viðtalinu að þeir félagar eru ekki beint hrifnir af FIFA. Raiola segir spillingu sambandsins það mikla að það þurfi að byggja sambandið upp að nýju, frá grunni. Þeir báðir, sem og margir kollegar þeirra, íhuga að lögsækja FIFA, meira um það hér að neðan.

„Munurinn á Jonathan og mér er sá að ég tel að FIFA eigi ekki að vera til. Það er minn draumur – vonandi lifi ég nægilega lengi til að sjá hann verða að veruleika – að við sjáum nýtt og heiðarlegra kerfi innan fótboltans, kerfið í dag er úrelt. Ef það er nýr skandall á hverju ári þá er það ekki tilviljun,“ sagði Raiola meðal annars.

Gianni Infantino er forseti Alþjóðaknattspyrnusambandsins FIFA.Getty

„Fyrir mér er FIFA of langt frá leiknum í dag. Sambandið situr nú í fílabeinsturni í Sviss og hefur ekki hugmynd um hvað leikmenn, umboðsmenn eða félög gera. Þeir setja regluverk sem hentar þeim en þeir vita ekkert hvað leikmenn gera, þeir þekkja ekki leikmennina. Sambandið setur upp og skipuleggur stórmót eins og heimsmeistarakeppnina, allt gott og blessað með það. Það ætti samt að halda sig fjarri því sem það þekkir ekki,“ sagði Barnett enn fremur og hélt svo áfram.

„FIFA birtir yfirlýsingu þess efnis að það sé mikil spilling og meira að segja peningaþvætti meðal umboðsmanna í heiminum. Þeir geta samt ekki nefnt eitt einasta dæmi. Það eru fjögur til fimm þúsund umboðsmenn bara í Bretlandi en þeir geta ekki nefnt einn sem hefur verið ákærður.“

„Þessar yfirlýsingar FIFA eru skandall og við höfum látið þá vita að við séum að íhuga lögsókn vegna þess að þetta á ekki við nein rök að styðjast í raunveruleikanum. Að sama skapi getum við sýnt fram á að fjölmargir meðlimir FIFA hafa verið handteknir og eru nú í fanglesi. Ég get sannað það.“

Um bresku pressuna

Þeir félagar ræða einnig ímynd umboðsmanna og þá sérstaklega í Bretlandi. Þar eru þeir illa liðnir af því að fjölmiðlar birta ítrekað neikvæða mynd af þeim. Þeir taka ekki eftir sömu andúð í öðrum löngum Evrópu.

Þá segja þeir að leikmenn myndu ekki vilja semja við þá ef þeir væru ekki að standa sig í stykkinu. Það að margir af bestu leikmönnum heims leiti til þeirra segi allt sem segja þurfi.

Luke Shaw átti ekki sjö dagana sæla er José Mourinho var þjálfari Manchester United.vísir/getty

Þeir taka einnig fram að allt sem þeir geri sé með hagsmuni leikmanna þeirra í huga. Til að mynda er Luke Shaw einn viðskiptavina Barnett. Það hefði verið lítið mál að koma Shaw í burtu frá Manchester United þegar José Mourinho virtist nýta hvert tækifæri til að gera lítið úr enska bakverðinum.

Shaw hafi hins vegar viljað vera áfram í Manchester og því hafi Barnett og hans fólk hjálpað honum að byggja upp annars brotna sjálfsmynd. Það hefur heldur betur skilað sér en Luke Shaw er í dag með betri vinstri bakvörðum Englands, ef ekki Evrópu.

Viðtalið er enn lengra og má finna í heild sinni á vef The Athletic.


Tengdar fréttir

Pogba svarar fyrir ummæli umboðsmanns síns

Paul Pogba hefur spilað vel fyrir Manchester United síðan umboðsmaður hans, Mino Raiola lét hafa eftir sér að skjólstæðingur sinn ætti ekki samleið með félaginu.




Fleiri fréttir

Sjá meira


×