Innlent

Þakk­látur Kári segir hvorki þurfa að óttast bólu­efni AstraZene­ca né Sput­nik V

Eiður Þór Árnason og Berghildur Erla Bernharðsdóttir skrifa
Kári Stefánsson, forstjóri Íslenskrar erfðagreiningar, var kátur í Laugardalshöll í dag. Eftir margra mánaða fræðilega stúdíu á bóluefnum gegn Covid-19 var komið að verklega hlutanum. 
Kári Stefánsson, forstjóri Íslenskrar erfðagreiningar, var kátur í Laugardalshöll í dag. Eftir margra mánaða fræðilega stúdíu á bóluefnum gegn Covid-19 var komið að verklega hlutanum.  Vísir/Sigurjón

Kári Stefánsson, forstjóri Íslenskrar erfðagreiningar, var meðal þeirra sem fengu bólusetningu við Covid-19 nú síðdegis. Um fjögur þúsund manns var boðið í Laugardalshöllina í dag þar sem notast var við bóluefni AstraZeneca.

Kári sagðist vera mjög þakklátur fyrir að hafa fengið bóluefni og hvetur alla til að þiggja slíkt boð. Ekki sé ástæða til að óttast öryggi bóluefnisins frá AstraZenca.

„Ég held að þetta bóluefni frá AstraZeneca sé að öllum líkindum svipað bóluefnunum frá Pfizer og Moderna. Það er bara óheppilegt að sagan í kringum AstraZeneca bóluefnið varð dálítið klaufaleg en þegar maður skoðar gögnin þá er þetta afskaplega gott bóluefni og líkur á aukaverkunum næstum því engar,“ sagði hann í samtali við fréttastofu skömmu eftir bólusetningu í Laugardalshöll.

Mikill fjöldi lagði leið sína í Laugardalshöll í dag.Vísir/Sigurjón

Bóluefnið í boði fyrir 70 ára og eldri

Hlé var um tíma gert á notkun bóluefnis AstraZeneca hér á landi á meðan athugun fór fram á tilfellum blóðtappa. 

Fram kom í máli Þórólfs Guðnasonar sóttvarnalæknis í gær að rannsóknir hafi nú sýnt að blóðsega- og blæðingavandamál kæmu nær eingöngu upp hjá einstaklingum yngri en 60 ára. Í kjölfarið var tekin ákvörðun um hefja notkun efnisins aftur og verður það fyrst um sinn gefið 70 ára og eldri.

Sömuleiðis benda nýleg gögn til þess að bóluefnið sé jafn virkt í eldri aldurshópum og hjá þeim yngri og fækki tilfellum Covid-19 um 85 prósent. Er það svipað hlutfall og hjá bóluefni Pfizer/BioNTech og Moderna.

„Það má ekki gleyma því að það er verið að bólusetja tugi milljóna með þessum bóluefnum. Tölfræðin segir okkur að eitthvað af þessu fólki sem er bólusett hlýtur að fá alvarlega sjúkdóma vegna þess að þetta bóluefni ver mann bara fyrir Covid en engu öðru,“ sagði Kári.

Svo það hefur aldrei verið efi í þínum huga, jafnvel á meðan það voru fréttir um að það væri verið að skoða þetta?

„Nei. Mjög lítill efi.“

Kári fylgdi ekki tilmælum heilsugæslunnar um að mæta í stuttermabol innst klæða.Vísir/Sigurjón

Til í Sputnik V

Kári segir það bagalegt að Íslendingar séu að fá færri skammta af bóluefni en vonast var til og að það hefði verið mjög gott ef hægt yrði að bólusetja meirihluta landsmanna fyrir sumarið. Nú sé þó ekki útlit fyrir að svo verði.

Aðspurður um hvort hann telji að stjórnvöld eigi að leggja aukna áherslu á að fá skammta af rússneska bóluefninu Sputnik V segir Kári mikilvægt að koma meira bóluefni tiltölulega hratt til landsins.

„Hvort það bóluefni heitir Sputnik eða eitthvað annað skiptir mig ekki máli. Öll bóluefni sem eru í notkun núna viðrast vera afskaplega góð.“

Ríkisstjórnin hefur gefið út að stjórnvöld hafi sett sig í samband við framleiðanda bóluefnisins og skoði nú mögulegan flöt á samstarfi en Sputnik V er nú í mati hjá Lyfjastofnun Evrópu.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.