Fótbolti

Axel Óskar skoraði í fyrsta leiknum en Esb­­jerg tapaði toppslagnum

Anton Ingi Leifsson skrifar
Axel Óskar er hann gekk í raðir Riga.
Axel Óskar er hann gekk í raðir Riga. mynd/heimasíða riga

Axel Óskar Andrésson er kominn á blað í Lettlandi en hann skoraði eitt marka Riga FC í 3-0 sigri í dag.

Axel Óskar gekk í raðir lettneska liðsins fyrr á árinu en hann kom frá Viking í Noregi. Hann fékk algjöra draumabyrjun í dag.

Varnarmaðurinn öflugi var nefnilega búinn að skora eftir einungis sextán mínútna leik en lokatölur 3-0. Leikurinn var liður í fyrstu umferð deildarinnar.

Hörður Björgvin Magnússon spilaði allan leikinn og Arnór Sigurðsson í hálftíma er CSKA Moskva tapaði 2-1 fyrir Arsenal Tula í rússneska boltanum.

Arsenal var 2-0 yfir í hállfeik en CSKA minnkaði muninn á 90. mínútu. Í uppbótartíma fengu tveir leikmenn Arsenal að líta rauða spjaldið en CSKA tókst ekki að jafna. Þeir eru í 2. sæti deildarinnar.

Guðlaugur Victor Pálsson spilaði allan leikinn er Darmstadt vann 4-1 sigur á Erzgebirge Aue. Darmstadt er í tólfta sæti deildarinnar með 31 stig.

Íslendingaliðið Esbjerg tapaði 2-0 fyrir Viborg í toppslag í dönsku B-deildinni. Ólafur Kristjánsson er þjálfari Esbjerg sem er nú í þriðja sætinu með 45 stig, Silkeborg er í öðru sætinu með 46 en Viborg á toppnum með 53 stig.

Kjartan Henry Finnbogason var í byrjunarliði Esbjerg og Andri Rúnar Bjarnason kom inn á sem varamaður í síðari hálfleik. Kjartan fékk fínt færi í fyrri hálfleik en náði þá ekki að koma Esbjerg yfir.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.