Þetta sagði Þórólfur Guðnason, sóttvarnalæknir í Bítinu á Bylgjunni, í morgun. Þá sagði hann ekki endilega á þessari stundu verið að ræða um einhverjar harðar aðgerðir. Sjá þurfi hvað komið hafi út úr sýnatökum gærdagsins en endanlegar tölur eru ekki komnar.

Þórólfur sagði að á meðan ekki væru fleiri orðnir ónæmir fyrir veirunni hér innanlands þá gætu smit alltaf komið upp.

„Við höfum verið að gera allt sem við getum til að lágmarka þessa áhættu, bæði fá veiruna inn og eins og að hún smitist. En svo gerist þetta og þá var bara gripið til mjög harðra aðgerða í kringum þessi tilfelli bæði skima mikið og margir settir í sóttkví,“ sagði Þórólfur.

Í kvöldfréttum Stöðvar 2 í gær sagði hann tilslakanir á sóttvarnaaðgerðum ekki á dagskrá og í morgun sagði hann ekki verið að ræða harðar aðgerðir á þessari stundu.

„Við þurfum að sjá hvað sýnatökurnar í gær skiluðu, það er ekki komin endanleg niðurstaða á það. Svo þurfum við að sjá bara næstu daga því eins og við vitum þá tekur upp undir viku að fá fram veikindi ef einhver hafa orðið. Þannig að við þurfum bara að sjá hvernig vikan verður svolítið,“ sagði Þórólfur.

Þá staðfesti hann að öll fjögur innanlandssmitin sem tengjast landamærasmitinu sem greindist í byrjun mars, og reyndist vera breska afbrigðið, séu einnig af þeim sama veirustofni.

„Þetta er allt saman breska afbrigðið. Auk þess getur raðgreiningin sýnt nokkurn veginn hver hefur smitað hvern þannig að við vitum að þetta tilheyrir sama upprunanum,“ sagði Þórólfur.

Of snemmt væri að segja til um það hvort fjórða bylgja faraldursins væri hafin. Sjá þyrfti hvernig takist að ná utan um smitin núna.

Hlusta má á viðtalið í heild sinni í spilaranum ofar í fréttinni.