Körfubolti

Boston Celtics liðið aðeins að braggast

Óskar Ófeigur Jónsson skrifar
Jayson Tatum var mjög góður í sigri Boston Celtics á Toronto Raptors í nótt.
Jayson Tatum var mjög góður í sigri Boston Celtics á Toronto Raptors í nótt. AP/Charles Krupa

Síðustu leikirnir fyrir Stjörnuleikshelgina fóru fram í NBA-deildinni í körfubolta í nótt og eitthvað var um það að stjörnuleikmenn liðanna voru hvíldir. Boston Celtics er komið á sigurgöngu og leikmenn Phoenix Suns unnu stórsigur á Golden State Warriors.

Jayson Tatum var með 27 stig og 12 fráköst þegar Boston Celtics vann 132-125 sigur á Toronto Raptors. Jaylen Brown var síðan með 21 stig og 7 fráköst og Kemba Walker skoraði 15 stig.

Boston liðið tapaði 9 af 14 leikjum sínum um tíma en leikmenn liðsins svöruðu áskorun þjálfara sínum Brad Stevens með því að vinna nú sinn fjórða leik í röð.

Toronto liðið lék án margra leikmanna en þeir Pascal Siakam, Fred VanVleet, OG Anunoby, Malachi Flynn og Patrick McCaw voru ekki með. Chris Boucher skoraði 30 stig, Norman Powell var með 25 stig og Terence Davis skoraði 22 stig.

Damian Lillard skoraði 44 stig þegar Portland Trail Blazers vann 123-119 sigur á Sacramento Kings. Enes Kanter var líka með tröllatvennu, skoraði 22 stig og tók 21 frákast. Carmelo Anthony kom með 16 stig inn af bekknum en hjá Kings var De'Aaron Fox atkvæðamestur með 32 stig, 12 stoðsendingar og 8 fráköst en Buddy Hield skoraði 21 stig þar af fimm þrista.

Sjóðheitt lið Phoenix Suns fór létt með Golden State Warriors og vann 120-98. Golden State hvíldi þá Stephen Curry og Draymond Green í leiknum. Cameron Payne var stigahæstur hjá Suns með 17 stig og 10 stoðsendingar af bekknum en Devin Booker skoraði 16 stig. Jordan Poole skoraði 26 stig fyrir Golden State.

Suns liðið hefur þar með unnið sextán af síðustu nítján leikjum sínum frá 28. janúar. Fyrir vikið er Phoenix komið upp fyrir bæði Los Angeles liðin og í annað sætið í Vesturdeildinni á eftir Utah Jazz.

Bradley Beal skoraði 33 stig og Russell Westbrook var einu frákasti frá þrennunni þegar Washington Wizards vann 119-117 sigur á Los Angeles Clippers. Westbrook endaði leikinn með 27 stig, 11 stoðsendingar og 9 fráköst. Beal er stigahæsti leikmaður deildarinnar og Wizards liðið hefur unnið átta af síðustu ellefu leikjum sínum.

Kawhi Leonard skoraði 22 stig, Patrick Beverley var með 17 stig og Ivica Zubac bætti við 13 stigum og 13 fráköstum fyrir Clippers. Liðið hefur tapað sex af síðustu níu leikjum sínum en Paul George hætti við að spila þegar honum svimaði fyrir leik.

Michael Porter Jr. skoraði 24 stig og tók 11 fráköst þegar Denver Nuggets vann Indiana Pacers 113-103. Nikola Jokic var síðan aðeins tveimur fráköstum frá þrennunni þar sem hann endaði með 20 stig, 12 fráköst og 8 stoðsendingar. Jamal Murray skoraði síðan 23 stig og hefur því skorað 22 stig eða meira í tólf leikjum í röð. Þetta var fjórði sigur Denver í röð.

Jrue Holiday skoraði sigurkörfu Milwaukee Bucks tveimur sekúndum fyrir leikslok þegar Milwaukee Bucks vann 112-111 útisigur á Memphis Grizzlies. Giannis Antetokounmpo var með 26 stig, 11 fráköst og 8 stoðsendingar og Khris Middleton bætti við 22 stigum og 10 fráköstum. Ja Morant skoraði 28 af 35 stigum sínum í seinni hálfleik fyrir Memphis.

Jimmy Butler var með 29 stig og 9 stoðsendingar þegar Miami Heat vann 103-93 sigur á New Orleans Pelicans sem lék án Zion Williamson. Kelly Olynyk hitti úr fjórum fyrstu þriggja stiga skotum sínum og endaði með 18 stig og 10 fráköst.

Shai Gilgeous-Alexander var með 33 stig fyrir Oklahoma City Thunder í 107-102 endurkomusigri á útivelli á móti San Antonio Spurs en Thunder vann seinni hálfleikinn 57-41.

Úrslitin í NBA í nótt:

  • Portland Trail Blazers - Sacramento Kings 123-119
  • Boston Celtics - Toronto Raptors 132-125
  • Washington Wizards - Los Angeles Clippers 119-117
  • Indiana Pacers - Denver Nuggets 103-113
  • Phoenix Suns - Golden State Warriors 120-98
  • New York Knicks - Detroit Pistons 114-104
  • Memphis Grizzlies - Milwaukee Bucks 111-112
  • New Orleans Pelicans - Miami Heat 93-103
  • San Antonio Spurs - Oklahoma City Thunder 102-107

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.

NBA



Fleiri fréttir

Sjá meira


×