Erlent

Telur mögulega ekki þörf á grímum í sumar

Kristín Ólafsdóttir skrifar
Lundúnabúar með grímur fyrir vitum í Mark & Spencer í janúar.
Lundúnabúar með grímur fyrir vitum í Mark & Spencer í janúar. Getty/SOPA Images

Mögulegt er að grímuskylda verði afnumin innandyra í Bretlandi yfir sumarmánuðina. Þetta kom fram í máli Jenny Harries, eins helsta heilbrigðismálaráðgjafa breskra stjórnvalda, á blaðamannafundi vegna kórónuveirufaraldursins í Bretlandi í dag.

Boris Johnson forsætisráðherra Bretlands hefur boðað að takmarkanir vegna veirunnar verði með öllu afnumdar í Bretlandi í fyrsta lagi 21. júní næstkomandi. 

Harries var innt eftir því á blaðamannafundinum í dag hvort Bretar yrðu enn skyldaðir til að bera grímur innandyra á almannafæri eftir þann tíma.

Hún sagði að sú yrði ekki endilega raunin – en grímur yrðu ef til vill skylda þegar veturinn gengur í garð.

„Eitt af því sem við vitum er, að sjálfsögðu, að það er mun öruggara að athafna sig utandyra en innandyra. Loftræsting, við vitum að hún er mjög mikilvæg. […] En það er mögulegt að yfir sumarmánuðina, líkt og í fyrra þegar smitum fækkaði, þurfum við ekki að bera grímur. Sumarið er almennt mun öruggara fyrir okkur og minni þörf á inngripi. En það útilokar hana [grímuskyldu] ekki þegar veturinn hefst á ný,“ sagði Harries.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.