Innlent

Hættustigi aflýst á Seyðisfirði og rýmingu aflétt

Sunna Kristín Hilmarsdóttir skrifar
Fyrr í vetur féllu aurskriður á Seyðisfjörð en í gær voru hús rýmd í bænum vegna snjóflóðahættu.
Fyrr í vetur féllu aurskriður á Seyðisfjörð en í gær voru hús rýmd í bænum vegna snjóflóðahættu. Vísir/Arnar

Veðurstofa Íslands hefur aflýst hættustigi á Seyðisfirði vegna hættu á snjóflóðum og þar með rýmingu aflétt á reitum 4 og 6 samkvæmt rýmingarkorti vegna snjóflóðahættu. Þetta kemur fram í tilkynningu frá almannavarnadeild ríkislögreglustjóra.

Áfram er þó í gildi óvissustig á Austurlandi vegna hættu á ofanflóðum. Seint í nótt stytti upp og verður úrkomulítið á Austurlandi í dag en áfram verður hlýtt og leysing.

Engin snjóflóð féllu á Seyðisfirði í nótt samkvæmt upplýsingum frá Veðurstofunni en ákveðið var að rýma þrjú hús í bænum í gærkvöldi vegna hættu á votum snjóflóðum.

Rýmingin tók gildi klukkan níu í gærkvöldi og náði til fyrrnefndra reita 4 og 6 á Seyðisfirði undir Strandartindi yst í sunnanverðum firðinum.

Á vef Veðurstofunnar segir að vott snjóflóð hafi fallið á þjóðveg 1 úr Grænafelli í Reyðarfirði í gær og lokað veginum.

„Þá féll vott snjóflóð í Seyðisfirði utan þéttbýlis. Krapaflóð féllu í Öræfasveit, Reyðarfirði og Fáskrúðsfirði. Háspennulína skemmdist innan við Teigarhorn í aurskriðu í gærkvöldi. Viðbúið er að fleiri flóð hafi fallið austan- og suðaustan lands sem koma í ljós þegar birtir í dag,“ segir á vef Veðurstofunnar.

Posted by Almannavarnadeild ríkislögreglustjóra on Monday, February 15, 2021

Fréttin hefur verið uppfærð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.