Innlent

Kyn­ferðis­brota­máli Jóns Bald­vins á Spáni enn vísað frá dómi

Jakob Bjarnar skrifar
Jón Baldvin Hannibalsson mætti í Ríkisútvarpið í byrjun árs 2019 til að svara ásökunum kvenna um að hann hafi beitt þær kynferðisofbeldi. Ásakanirnar eru orðnar býsna margar.
Jón Baldvin Hannibalsson mætti í Ríkisútvarpið í byrjun árs 2019 til að svara ásökunum kvenna um að hann hafi beitt þær kynferðisofbeldi. Ásakanirnar eru orðnar býsna margar. vísir/vilhelm

Kynferðisbrotamáli á hendur Jóni Baldvini Hannibalssyni hefur enn verið vísað frá dómi en ákæruvaldinu mistókst að sýna fram á að umrædd háttsemi væri refsiverð samkvæmt spænskum lögum.

Jóni Baldvini var gefið að sök að hafa „laugardaginn 16. júní 2018 á heimili sínu á Granada á Spáni, strokið utanklæða upp og niður eftir rassi Carmen Jóhannsdóttur sem var gestkomandi á heimili Jóns,“ eins og segir í úrskurði Héraðsdóms Reykjavíkur sem gefin var út nú í morgun. Ríkissjóði er gert að greiða Vilhjálmi Hans Vilhjálmssyni lögmanni Jóns Baldvins tæplega milljón krónur í málsvarnarlaun.

Málið velkist um í dómskerfinu

Talsvert hefur verið um málið fjallað en því er nú vísað frá öðru sinni. Héraðsdómur hafði áður vísað málinu frá en þá var því vísað til Landsréttar sem sendi það aftur í Héraðsdóm. Ástæðan var sú að lengri tími en fjórar vikur liðu frá því að munnlegum málflutningi um frávísunarkröfuna lauk og þar til úrskurður var kveðinn upp.

Málið hefur verið mjög til umfjöllunar í fjölmiðlum. Carmen steig fram og greindi frá reynslu sinni af heimsókn til þeirra hjóna Jóns Baldvins og Bryndísar Schram. Jón Baldvin svaraði þessum ásökunum af hörku og hefur haldið því fram að atvikið hafi verið sviðsett. Carmen krafði Jón Baldvin um eina milljón króna í miskabætur.

Síðbúinn sannleikur Þessi grein eftir mig birtist í BB á Ísafirði, mánudaginn 25.jan. Innst inni er ég...

Posted by Bryndis Schram on Miðvikudagur, 27. janúar 2021

Bryndís ritaði nýverið grein sem hún birti fyrst í vestfirska fréttaritinu BB en endurbirti þá greinina á Facebooksíðu sinni nú í vikunni. Þar fer hún yfir málið eins og það horfir við sér. Bryndís fjallar þar um ásakanir sem Jón Baldvin og þau hjón hafi mátt sitja undir.

„Ég held, að þetta fár, þetta skyndilega og ímyndaða hatur, sem um þessar mundir beinist að okkur í samfélagsmiðlum, sé sprottið af því, sem heitir á þýsku „Schadenfreude“ – það að gleðjast yfir óförum annarra. Þannig fær fólk útrás fyrir sína eigin gremju, sitt niðurbælda hatur á öllum og öllu. Það hefur nautn af því að rífa niður mannorð náungans og baða sig í eigin illsku. Skaðagleði heitir það á íslensku,“ segir Bryndís meðal annars í pistli sínum.

Vilhjálmur lögmaður krafðist frávísunar fyrir hönd Jóns Baldvins en ákæruvaldið fór fram á að þeirri kröfu væri hafnað og að málið fengi efnislega meðferð. Ákæruvaldið byggir mál sitt á því að háttsemi sú sem Jóni er gefið að sök sé refsiverð samkvæmt spænskum lögum.

Ruglingsleg Google-þýðing lögð fram

Í niðurstöðu er greint frá því að fyrir liggi tölvupóstsamskipti ákæruvaldsins og aðila hjá Eurojust um það efni.

„Ekki þykir ástæða til að lýsa þessum samskiptum ítarlega en þar kemur m.a. fram að sú sem fyrir svörum verður viti ekki hvort hún skilur vandamálið rétt,“ segir í úrskurðinum. 

„Ákæruvaldið óskaði eftir því að fá send dæmi úr spænskri dómaframkvæmd þar sem svipuð málsatvikalýsing og í máli þessu teldist brot gegn ofangreindum 1. t. 181 gr. spænskra hegningarlaga. Eftir það voru send gögn sem byggðust að því er virðist á Google-þýðingu þar sem seigir að torvelt kunni að vera að þýða úr spænsku en farið hafi verið yfir Google-þýðinguna í fljótheitum, eins og segir. Í kjölfarið fylgir það sem sagt er vera skilgreining á kynferðislegri áreitni. Vegna beiðni ákæruvaldsins um dóma þar sem málsatvik væru svipuð og í máli þessu fylgir stutt endursögn málsatvika dóms þar sem málsatvik eru ekki sambærileg þeim sem lýst er í ákæru.“

Guðjóni St. Marteinssyni héraðsdómara þykir ekki ástæða til að rekja þessi samskipti frekar. Tölvupóstsamskiptin sem fylgja eru svo ónákvæm og óljós að þau teljast ófullnægjandi. Því verði að vísa málinu frá.


Tengdar fréttir

Segir ákveðinn sigur að Jón Baldvin hafi verið ákærður

Jón Baldvin Hannibalsson, fyrrverandi utanríkisráðherra, hefur verið ákærður fyrir kynferðisbrot gagnvart konu sem var gestkomandi á heimili hans á Spáni í júní 2018. Konan segist fegin að málið sé komið til ákæruvaldsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.