Innlent

Sau­tján and­lát rakin til hóp­smitsins á Landa­koti

Sunna Kristín Hilmarsdóttir skrifar
Hópsýking kom upp á Landakoti í október í fyrra. Meirihluta andláta vegna Covid-19 hér á landi má rekja til sýkingarinnar. 
Hópsýking kom upp á Landakoti í október í fyrra. Meirihluta andláta vegna Covid-19 hér á landi má rekja til sýkingarinnar.  Vísir/Vilhelm

Alls eru sautján andlát rakin til hópsmitsins sem kom upp á Landakoti í október í fyrra. Fjórtán þeirra sem létust vegna Covid-19 og smituðust af veirunni í hópsýkingunni létust á Landakoti. Þrír létust á hjúkrunarheimilinu Sólvöllum á Eyrarbakka.

Þá létust tveir einstaklingar á hjúkrunarheimilinu Bergi í Bolungarvík vegna smits sem kom upp þar síðastliðið vor og einn einstaklingur lést á Landspítala eftir að hafa smitast af veirunni á hjúkrunarheimilinu Ísafold í Garðabæ.

Þetta kemur fram í svari Svandísar Svavarsdóttur, heilbrigðisráðherra, við fyrirspurn Gunnars Braga Sveinssonar, þingmanns Miðflokksins, um fjölda sýkinga og andláta af völdum kórónuveirunnar.

Gunnar Bragi spurði hve mörg andlát megi rekja til hópsmitsins á Landakoti annars vegar og smita á öðrum sjúkrastofnunum hins vegar. Svar ráðherra er eftirfarandi:

„Það létust 14 einstaklingar á Landspítala í kjölfar hópsmits á Landakoti. Á hjúkrunarheimilinu Bergi í Bolungarvík létust tveir einstaklingar. Þrír einstaklingar létust á hjúkrunarheimilinu Sólvöllum á Eyrarbakka en þau smit eru rakin til hópsýkingarinnar á Landakoti. Einn einstaklingur lést á Landspítala eftir smit á hjúkrunarheimilinu Ísafold í Garðabæ.“

Alls hafa 29 manns látist af völdum Covid-19 hér á landi frá upphafi faraldursins. Meirihluta andlátanna má því rekja til hópsmitsins á Landakoti. Tíu manns létust í fyrstu bylgju faraldursins og í þriðju bylgjunni hafa nítján manns látist.

Faraldur kórónuveiru (COVID-19) Landspítalinn
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið