Fjöldi hótelherbergja hefur tvöfaldast frá aldamótum

Sífellt fleiri hótel og gistiheimili hafa verið opnuð á höfuðborgarsvæðinu en gistirýmum hefur fjölgað um tæplega 600 herbergi á síðastliðnum þremur árum. Hótelstjóri segir nóg að gera þrátt fyrir aukið framboð.

Árin 2000 til 2008 var stöðug aukning á framboði, en á þeim árum fjölgaði herbergjum á hótelum og gistheimilum á höfuðborgarsvæðinu um 1475 og voru árið 2008 rúmlega 3400 talsins. Næsta ár á eftir fækkaði svo herbergjum um fjörutíu. Síðan þá hefur framboðið aukist aftur og í lok síðasta árs var fjöldinn kominn upp í rúmlega 3930. Það er aukning um tæplega 600 herbergi á þremur árum.



Við Höfðatorg á að rísa hótel með yfir 340 herbergjum, en það er ekki bara nóg að byggja bara ný og glæsileg hótel því einhverjir verða gestirnir að vera til þess að reksturinn standi undir sér. Það er því jákvætt að erlendir ferðamenn eru spenntir fyrir landi en samkvæmt tölum á vef Ferðamálastofu voru rúmlega 311.000 slíkir sem komu inn til landsins frá janúar til júní á þessu ári.

Sólborg Steinþórsdóttir, hótelstjóri Icelandair Hotel Reykjavík Natura, segir að það sé nóg að gera á hótelinu. „Það er bara fínt að gera, gott sumar og nóg að gera. Að vísu er breyting frá því sem hefur verið að það er meira að gera yfir vetrartímann, þannig að það er ekki eins mikið bil á milli sumars og veturs."

Sólborg segir að gestir hótelsins séu vel stemmdir, enginn hafi kvartað yfir veðrinu í sumar enda eru þeir fyrst og fremst að koma til að njóta íslenskrar náttúru og til þess þarf ekki endilega sól.